Balqash tórtinshi kún sýsyz otyr: Qubyrdan taǵy aqaý shyqty
Balqash sorǵy stantsııasy aýmaǵyndaǵy magıstraldyq sý qubyrynda iri apat 4 sáýirde bolǵan edi.
Keshe ákimdikte mamandar dıametri 800 mm negizgi qubyrdan dıametri 400 mm aǵyzý qubyrynda ysyrmany bólshektegenin jáne jóndeý jumystary aıaqtalǵanyn habarlady. Qala bıligi sý kezeń-kezeńimen berile bastaıdy dep ýáde berdi.
Búgin Balqash qalasy ákimdiginiń baspasóz qyzmeti 6 sáýirde qalalyq rezervýarlar taza sýmen toltyryla bastaǵanyn, alaıda aıdalatyn sý kólemi ulǵaıǵan kezde bas sorǵy stantsııasynda ysyrma keptelip qalǵanyn habarlady.
«Magıstraldyq qubyrdaǵy sý soqqylary men ekpinderdi boldyrmaý maqsatynda Toqyraý bas sorǵy stantsııasynan qalanyń taza sý rezervýarlaryna sý berý birtindep ulǵaıtyla otyryp júrgizildi. Sý berý kóleminiń kezekti ulǵaıýy kezinde negizgi sorǵy stantsııasynda dıametri 500 mm ysyrmanyń keptelýi oryn aldy. Bul bizge jumys parametrlerine shyǵýǵa múmkindik bermeı jatyr», – delingen habarlamada.
Aýyzsýsyz qalǵan qala turǵyndary úshin tórt sý tasıtyn kólik jumys isteýde. Olardyń biri – Qońyrat shaǵynaýdanynda, ekinshisi – Balqash stantsııasynda, taǵy ekeýi barlyq shaǵynaýdan boıynsha júredi.
Aıta keteıik, oblys ákimi Ermaǵanbet Bólekpaev «Balqash sý» basshysynyń atqaryp otyrǵan laýazymyna sáıkestigin qarastyrý týraly tapsyrma berdi. Sondaı-aq apatqa baılanysty qyzmettik tergeý júrgizýdi tapsyrdy. Ol oqıǵanyń sebepterin anyqtaýdy jáne mundaı jaǵdaı qaıtalanbaýy úshin barlyq qajetti sharany qabyldaýdy talap etti.
«Balqash sý» basshylyǵy óziniń qabiletsizdigin kórsetti dep sanaımyn. Belgili bolǵandaı, qaqpa klapany osy ýaqytqa deıin sýda turǵan. Nege tekserilmegen? Basshynyń atqaratyn laýazymǵa sáıkestigin qarastyrýdy tapsyramyn. Qyzmettik tergeý júrgizińizder. Jobany kóterińizder, eger qateler bolsa, bárin túzetý kerek. Barlyǵyn birneshe ret tekserińizder. Áreket etińizder!», - dedi oblys ákimi.
