Balqash polıtehnıkalyq kolledjiniń stýdentteri Túrkııa ýnıversıtetterine grantqa túse alady
ASTANA. KAZINFORM – Jumysshy mamandyqtary ókilderiniń arasynda ótken «WorldSkills Kazakhmys 2024» IV korporatıvtik chempıonaty aıasynda «Qazaqmys» Polıtehnıkalyq kolledji Túrkııa Respýblıkasynyń ýnıversıtetter qaýymdastyǵymen kelisimge qol qoıdy. Nátıjesinde kolledjdiń 20 shaqty stýdenti oqýyn aıaqtaǵan soń, Túrkııadaǵy ýnıversıtetterge grantqa túsý múmkindigine ıe bolady.
Kezdesý barysynda bilim berý mekemeleri men bıznes arasyndaǵy yntymaqtastyqtyń bolashaǵy talqylanyp, taraptar korporatıvtik chempıonat uıymdastyrý boıynsha tájirıbe almasty.
Kelissózdiń mańyzdy sátteriniń biri – Qazaqmys korporatsııasy Polıtehnıkalyq kolledjiniń YKC INTERNATIONAL kompanııasy jáne «Turkye-grant» JShS arasyndaǵy yntymaqtastyq týraly memorandýmǵa qol qoıý boldy. Bul kelisim halyqaralyq baılanysty nyǵaıtýǵa jáne stýdentterdiń quzyrettiligin arttyrýǵa baǵyttalǵan.
Memorandým aıasynda Túrkııa Respýblıkasy ýnıversıtetteriniń jetekshi professorlary Polıtehnıkalyq kolledj stýdentterine túrik jáne aǵylshyn tilderinen onlaın kýrs ótkizetini týraly kelisimge qol jetkizildi. Bul stýdentterge til meńgerýge qosymsha bir jyl ýaqyt joǵaltpaı, Túrkııanyń joǵary oqý oryndaryna túsýge múmkindik beredi.
Kolledj tárbıelenýshileri óndiristik jarysta ózderin laıyqty deńgeıde kórsetti. Jarysta alty túrli quzyret boıynsha kolledj stýdentteri men Qazaqmys kompanııalar Tobynyń Jezqazǵan, Qaraǵandy jáne Balqash alańdaryndaǵy kásiporyndarynan 73 adam qatysyp, baq synady.
Qatysýshylar naqty ómirlik jaǵdaıǵa negizdelgen tapsyrmalardy oryndady. Qazylar alqasy qatysýshylardy jumystyń sapasy, dáldigi, jyldamdyǵy, qoldanylǵan ınnovatsııalar jáne qaýipsizdik erejelerin saqtaý boıynsha baǵalady.
Chempıonat qorytyndysynda alty quzyret boıynsha jeńimpaz anyqtalyp, olarǵa dıplomdar men syılyqtar tabystaldy.
«Slesarlyq is» quzyretinde Balqash polıtehnıkalyq kolledjiniń 4-kýrs stýdenti Nurtas Qadyrberlın jeńiske jetti. «Dánekerleý isinde» elektrgazben dánekerleýshi Kenjebek Tursynbek úzdik dep tanyldy.
«Metallýrgııa» quzyretinde Jezqazǵan mys qorytý zaýytynyń sý eritindilerin elektrolızdeýshi Qurban Baımanov birinshi oryndy ıelendi.
«Stropaldyq is» quzyretinde kolledjdiń 4-kýrs stýdenti Bekarys Bekzatuly jeńiske jetti.
«Elektromontaj» quzyretinde Jaqyp Baǵdaýlet joǵary sheberlik kórsetti. Ol ekinshi razrıadty transformator jınaýshy bolyp jumys isteıdi. «Eńbek qaýipsizdigi» boıynsha altynshy quzyrette elektromehanık Nurbolat Álibekov úzdik dep tanyldy.
Chempıonat «Kazakhmys Smelting» JShS mys elektrolızi tsehy, MJMB jáne kolledjdiń kadrlardy daıarlaý jáne qaıta daıarlaý ortalyǵy bazasynda ótti.
