Balqash mys balqytý zaýytyna 6,3 mln teńge aıyppul salyndy
QARAǴANDY. KAZINFORM - Balqash mys balqytý zaýytynda atmosferalyq aýany qorǵaý talaptarynyń saqtalýyna tekserý júrgizildi. Mamandar lastaýshy zattardyń shyǵaryndylaryna jáne tehnologııalyq jabdyqtardyń tehnıkalyq jaǵdaıyna qatysty birqatar zań buzýshylyqtardy anyqtady.
Qaraǵandy oblysy boıynsha Ekologııa departamenti «Kazakhmys Smelting» JShS-ne jospardan tys tekserý júrgizdi. Inspektorlar óndiristik nysandardy, tehnologııalyq jabdyqtardy, gaz tazartý qondyrǵylary men shyǵaryndylar kózderin tekserdi.
Tekserý barysynda mamandar aspaptyq ólsheýler júrgizip, shyǵaryndy gazdardan synama aldy. Nátıjesinde atmosferaǵa taralatyn lastaýshy zattardyń ruqsat etilgen shyǵaryndylary normatıvterinen asyp ketý faktisi anyqtaldy.
Sonymen qatar tehnologııalyq jabdyqtardyń tıisti tehnıkalyq jaǵdaıda bolmaýynan týyndaǵan uıymdastyrylmaǵan shyǵaryndylar tirkeldi.
Anyqtalǵan zańbuzýshylyqtar boıynsha kásiporynǵa qoldanystaǵy zańnama talaptaryna sáıkes tıisti sharalar qabyldandy. Salynǵan ákimshilik aıyppuldardyń jalpy somasy 6 mln 363 myń 805 teńgeni qurady.
Buǵan deıin Qaraǵandy oblysyndaǵy Qaraǵaıly baıytý fabrıkasynda júrgizilgen tekserý barysynda ekologııalyq zańnama talaptarynyń birneshe baǵyt boıynsha buzylǵany anyqtalǵany habarlanǵan edi.
