Balqash mańynda avtobýs júk kóligimen soqtyǵysty: adam shyǵyny bar
QARAǴANDY. KAZINFORM – Astana – Almaty tas jolynda jolaýshylar avtobýsynyń qatysýymen iri jol-kólik oqıǵasy tirkeldi. Saldarynan bir adam qaza taýyp, taǵy úsheýi aýrýhanaǵa jetkizildi.
Jol-kólik oqıǵasy 21 naýryz kúni shamamen saǵat 05:00-de Astana – Almaty avtojolynyń 747-shaqyrymynda, Saryshaǵan kenti mańynda, Jambyl oblysy shekarasynan úsh shaqyrym jerde boldy. Aldyn ala málimetterge sáıkes, 49 jastaǵy jolaýshylar avtobýsynyń júrgizýshisi kólik tizginine ıe bola almaı, jol jıeginde ilespe baǵytta toqtap turǵan Volvo markaly júk kóligine soǵylǵan.
– Apat kezinde avtobýsta 33 jolaýshy bolǵan. Soqtyǵys saldarynan bir adam oqıǵa ornynda qaza tapty, taǵy úsh jolaýshy túrli dene jaraqattarymen medıtsınalyq mekemelerge jetkizildi, - dep málimdedi Qaraǵandy oblysy Polıtsııa departamenti.
Polıtsııa jol qozǵalysy erejelerin qatań saqtaý, sondaı-aq júrgizýshilerdiń eńbek pen demalys rejımin buljytpaı oryndaý qajettigin únemi eskertip keledi. Alaıda jekelegen júrgizýshiler bul talaptardy elemeı, salǵyrttyq tanytýda. Tájirıbe kórsetkendeı, mundaı jaýapsyzdyq kóp jaǵdaıda aýyr jol apattaryna ulasady.
Tártip saqshylary júrgizýshilerge qaýipsizdiktiń negizgi qaǵıdalaryn qatań ustanýǵa keńes beredi: jyldamdyq rejımi men araqashyqtyqty saqtaý, sharshaǵan kúıde rólge otyrmaý, ár 2-3 saǵat saıyn demalys jasaý, jolǵa shyǵar aldynda kóliktiń tehnıkalyq jaǵdaıyn tekserý jáne ásirese qarańǵy ýaqytta aýa raıy jaǵdaılaryn eskerý.
Polıtsııa ókilderiniń aıtýynsha, róldegi sharshaý reaktsııany baıaýlatyp, orny tolmas qaıǵyly jaǵdaılarǵa sebep bolýy múmkin. Joldaǵy qaýipsizdik – árbir qozǵalys qatysýshysynyń jeke jaýapkershiligi.
Eske sala keteıik, buǵan deıin Astana – Qaraǵandy – Almaty tas jolynda bolǵan jol apatynda 3 adam qaza tapqan edi.
