Balqash kóline aparatyn joldyń qurylysy bıyl aıaqtalady
TALDYQORǴAN. KAZINFORM – Jetisý oblysynda «Almaty — Óskemen — Lepsi — Aqtoǵaı» jolynyń qurylysy aıaqtalýǵa jaqyn. Bul jol óńirdi Balqash kólimen baılanystyrady. Qazir aýqymdy jobanyń qaı kezeńde ekenin Kazinform agenttiginiń tilshisi anyqtap kórdi.
«Almaty — Óskemen — Lepsi — Aqtoǵaı» baǵyty
Uzyndyǵy 105 shaqyrym joldyń qurylysy 2018 jyly bastaldy. Ol eki kezeń boıynsha júzege asyrylyp jatyr. Alǵashqy bóligi – 0-den 35 shaqyrymǵa deıingi aralyq 2021 jyly paıdalanýǵa berildi. Alaıda qalǵan bólikteri qarjylandyrýdyń jetispeýshiligine baılanysty kesheýildep keldi. Bes jylda joba birneshe ret ózgertilip, onyń jalpy quny aıtarlyqtaı ósti.
Qazir 35-105 shaqyrym aralyǵyna alǵashqy asfalt qabaty tolyq tóseldi. Onyń 90 shaqyrymyna ekinshi qabaty salyndy. Qalǵan 40 shaqyrymǵa sońǵy, joǵarǵy qabatty tóseý qaldy. Bul jumystardy osy jyldyń tamyz aıynyń sońyna deıin aıaqtaý josparda. Osydan keıin jol boıyn abattandyrý, jol tańbalaryn salý jáne jol jıegin nyǵaıtý jumystary bastalady.
— Byltyr biz joldyń osy bóligin 15 maýsymǵa deıin ashýǵa ýáde bergen edik, qazir qozǵalys úshin jol ashyq. Joǵarǵy qabatty tóseý jumystary kólik qozǵalysyna kedergi keltirmeıdi, — dedi Jetisý oblysy jolaýshylar kóligi jáne avtomobıl joldary basqarmasynyń basshysy Ǵalymjan Dáribaev.
Jobanyń quny — 30 mlrd teńge
Joba merdigeri – «Jol» JShS, ol joldy qaıta jańǵyrtý jumystaryn 2018 jyly bastaǵan. Alaıda respýblıkalyq bıýdjettiń shekteýli qarjylandyrýyna baılanysty (jylyna 2–3 mlrd teńge kóleminde), qurylys baıaý júrdi. Sońǵy eki jylda oblystyq bıýdjetten qosymsha qarjy bólinip, joba qarqyndy iske asa bastady. Jalpy 30,4 mlrd teńge bolatyn jobanyń jartysyn óńir ózi qarjylandyrdy.
— Sońǵy eki jyl ishinde biz oblystyq bıýdjetten 11 mlrd teńge ıgerdik, — dep atap ótti spıker.
Týrızm men halyq úshin mańyzdy jol
Atalǵan jol ásirese jaz mezgilinde suranysqa ıe — kúnine bul baǵytpen 6 myńǵa deıin kólik júredi. Olardyń basym bóligi Balqash kóline baratyn demalýshylar. Buǵan deıin júrgizýshiler aınalma jolmen júrdi, bul birqatar qolaısyzdyq týdyrǵan.
— Adamdar kóp qıyndyqqa tap bolatyn: shuryq-tesik jol, dóńgelektiń tesilý jaǵdaılary. Qazir Taldyqorǵannan Balqashqa eki saǵatta jetýge bolady, — dedi basqarma basshysy.
Jol ekinshi sanat boıynsha salynǵan: eni 4,5 metr bolatyn eki jolaq bar.
Spıkerdiń sózinshe, bul jetkilikti, sebebi bul — oblystyq mańyzy bar jol jáne munda kólik qozǵalysynyń joǵary tyǵyzdyǵy baıqalmaıdy.
— Joba jol aktıvteri ulttyq sapa ortalyǵynyń saraptaýynan ótken. Qazir jumystardyń sapasyna qatysty másele joq. Merdiger kompanııa jol sapasyna bes jyldyq kepildik beredi, al joldyń aralyq jóndeý merzimi — on jyl,— deıdi ol .
Infraqurylym
Joba aıasynda Mataı men Lepsi ýchaskelerinde (60 - 104 km) eki kópir salyndy. Jol boıynda tórt demalys aımaǵy paıda bolady. Onda shatyrlar, dárethana, turaq jáne qoqys jáshikteri qarastyrlyǵan. Barlyǵy 14 zamanaýı dárethana ornatylady, olardy kútip ustaýmen merdiger kompanııa aınalysady. Qurylys jumystary táýlik boıy júrgizilip jatyr. 100-den astam maman men 65 arnaıy tehnıka jumyldyryldy.
Aıta keteıik, byltyr «Lepsi — Balqash kóli» aralyǵyndaǵy (0–27 km) jol tolyq jóndelip, paıdalanýǵa berildi. Bul jobany basqa otandyq kompanııa — «Qazstroıtsentr» JShS júzege asyrdy.
Eske salaıyq, buǵan deıin 2024 jyldyń sońyna deıin «Almaty — Óskemen — Lepsi — Aqtoǵaı» baǵytyndaǵy 90 shaqyrym jol asfaltpen jabylatyny týraly jazǵanbyz.