Balqash kólinde shomylǵan áıel jaǵalaýǵa jete almaı qaldy
QARAǴANDY. KAZINFORM — Qaraǵandy oblysy, Prıozersk qalasyndaǵy Balqash kólinde qutqarýshylar 1995 jyly týǵan áıelge kómek kórsetti. Ol qatty aǵysqa qarsy júze almaı, jaǵalaýǵa jete almaı qalǵan. Bul týraly TJM málim etti.
— Áıeldi aǵys alyp ketken. Qutqarý sheńberine jetýge tyrysqan, alaıda aǵysqa qarsy júzýge shamasy jetpeı, qalyp qoıǵan. Qutqarýshylar dereý áreket etip, ony sýdan shyǵaryp, jaǵaǵa jetkizdi, — delingen habarlamada.
Qazirgi tańda jaǵdaıy turaqty. Oǵan medıtsınalyq tekserý men qajetti kómek alý úshin aýrýhanaǵa jetkizildi.
Buǵan deıin habarlanǵandaı, Batys Qazaqstanda sýǵa batyp ketkender sany 20-ǵa jetti.
Al Almaty oblysynda jyl basynan beri 9 adam sýǵa batyp ketken.
Atyraý oblysynda bolsa bir aýyldyń 2 jasóspirimi Jaıyqqa batyp ketti.
Qaıǵyly oqıǵaǵa jol bermeý maqsatynda Qapshaǵaı jaǵajaılaryna beınebaqylaý kameralary ornatyldy.