Balqash kólinde 100 keliden astam balyqty zańsyz aýlaǵan brakoner sottaldy

ASTANA. KAZINFORM — Er adamnyń qaıyǵy men balyq aýlaý quraldary tárkilenip, ózi úsh jylǵa bas bostandyǵynan aıyryldy.

Ótken jyldyń kúzinde Moıynqum aýdanynyń turǵyny Balqash kólinen zańsyz balyq aýlap, onyń ústinen qylmystyq is qozǵalǵan bolatyn. 

Ol 112 keliden astam balyq aýlap, memleketke 576 000 teńgeden astam shyǵyn keltirgen.

Sot otyrysy barysynda er adam óz kinásin tolyq moıyndap, jasaǵan áreketine ókinetinin aıtty. Aıyptaýshy tarap úsh jylǵa bas bostandyǵynan aıyrýdy talap etti.

Sot kináni moıyndaýdy jáne aýyrlatatyn mán-jaılardyń joqtyǵyn eskere otyryp, aýyl turǵynyn zańsyz balyq aýlaǵany úshin kináli dep tanydy jáne úsh jyl merzimge balyq aýlaý quqyǵynan aıyryp, úsh jyl bas bostandyǵyn shekteý túrindegi jaza taǵaıyndady.

Sonymen qatar, sottalǵan turǵyn memleketke keltirilgen shyǵyn somasyn tóleýge mindetteldi. Motorly qaıyq, borttyq motor, torlar men zańsyz aýlanǵan balyqtar tárkilenip, memleket menshigine ótti.

Buǵan deıin Aqmola oblysynda 640 keli balyq aýlaǵan brakonerler sottaldy.

Aıta keteıik, Jambyl oblysynda zańsyz ańshylyqtan kelgen zalal 92 mln teńgeden asty.