Balqash kólin júzip ótken sportshylar 21 shaqyrymdy eńserdi
BALQASh. KAZINFORM - Jel men bıik tolqynǵa qaramastan, Balqash kólindegi halyqaralyq jarys aıasynda 21 shaqyrymdyq ashyq sýdaǵy júzý qashyqtyǵyn sportshylar tolyq eńserdi. Toranǵalyqtan «Jemchýjına» demalys aımaǵyna deıingi jol olar úshin fızıkalyq tózimdilikpen qatar, jiger men tabandylyqty talap etken syn boldy.
Balqash kólinde ótken halyqaralyq jarys baǵdarlamasyna 21 shaqyrymdyq ashyq sýdaǵy júzý engizildi. Dodaǵa 12 sportshy shyqty. Olardyń qatarynda úsh áıel – Astanadan Jannat Qatarbaeva, Almatydan ıÝlııa Kýznetsova jáne Atyraýdan ıÝlııa Ageeva bar.
Júzý ońaıǵa soqpady. Qashyqtyq boıynda jeldiń jyldamdyǵy saǵatyna 29 shaqyrymǵa deıin jetti. Bıik tolqyndar sportshylardyń qozǵalysyn baıaýlatyp qana qoımaı, ashyq sýda baǵyt-baǵdaryn dál anyqtaýdy da qıyndatty.
Qashyqtyqty tolyq baǵyndyrǵandardyń biri – Astanadan kelgen 46 jastaǵy Jannat Qatarbaeva. Zańger bolyp jumys isteıtin sportshy eki bala tárbıelep otyr. Ol júzýmen 40 jasynda ǵana aınalysa bastaǵan. Alǵashynda dárigerlerdiń keńesimen densaýlyǵyn nyǵaıtý úshin basseınge barǵan.
– Jarys bastalar aldynda qobaljý da, qorqynysh ta, «Osyndaı qashyqtyqty eńsere alamyn ba?» degen kúmán da boldy. Ásirese 12-16 shaqyrym aralyǵy qıynǵa soqty. Birneshe ret jarystan shyǵýdy oıladym. Biraq júzýdi toqtatpadym, – deıdi Jannat Qatarbaeva.
Sportshynyń aıtýynsha, Balqashtaǵy júzýge shamamen bir jyl daıyndalǵan. Aptasyna úsh ret jattyqtyrýshy Dmıtrıı Derevıankomen basseınde jattyqsa, taǵy eki kúnin Vıtalıı Pavlovpen kúsh daıyndyǵyna arnaǵan. Jarysqa alty aı qalǵanda basseındegi jattyǵýlar sanyn aptasyna tórt retke deıin jetkizgen.
Jannattyń ashyq sýdaǵy alǵashqy tájirıbesi birinshi jattyqtyrýshysy Mahambet Ersaıynovtyń usynysynan keıin bastalǵan. Ol alǵash ret BURABAY SWIM jarysynda Býrabaı kólin 4,5 shaqyrym júzip ótken. Jattyqtyrýshysy janynda bolǵanymen, sportshy sol kezde qatty qoryqqanyn eske alady. Keıin birtindep jańa jarystarǵa qatysyp, uzaq qashyqtyqtardy baǵyndyra bastaǵan.
– Men kásibı sportshy emespin. Júzýmen aınalysyp júrgenime nebári alty jyl boldy. Bul sportqa 40 jastan keıin keldim. Alǵashynda tek densaýlyǵymdy jaqsartýdy kózdedim. Jarystarǵa qatysyp, uzaq qashyqtyqtarǵa júzemin dep oılaǵan da joqpyn, – dedi ol.
21 shaqyrymdyq qashyqtyqty tolyq eńsergenderdiń taǵy biri – Qýanysh Asqar. Ol búkil joldy bir qolmen júzip ótti.
Sportshy jarysqa daıyndyq kezinde fızıkalyq jattyǵýmen qatar, psıhologııalyq turǵydan da daıyndalǵanyn aıtty. Buǵan deıin 10 shaqyrymdyq júzýlerge qatysyp, ashyq sýda uzaq qashyqtyqtardy baǵyndyrý tájirıbesin jınaǵan.
– Qashyqtyqty aıaqtaı almaımyn degen oıdy ózime jolatpadym. Óıtkeni ondaı oı sanaǵa kirse, qorqynysh pen senimsizdik kúsheıe túsedi. Meni alǵa jetelegen jalǵyz oı – mindetti túrde márege jetýim kerek degen senim boldy, – dedi Qýanysh Asqar.
Júzý kezinde sportshylarǵa tolqynmen arpalysýǵa týra keldi. Qýanysh Asqardyń aıtýynsha, keı tustarda tolqynnyń bıiktigi 2,5-3 metrge deıin jetken. Tolqyn jotalarynyń arasynan qatysýshylar keıde jaǵalaýdy da, súıemeldeý qaıyǵyn da kóre almaı, baǵytynan jańylǵan.
Qýanysh úshin eń kúrdeli sát shamamen 11-12 shaqyrym tusynda bolǵan. Sol kezde ony súıemeldep kele jatqan qaıyqta aqaý paıda bolyp, borttaǵy 13 jastaǵy ulyna alańdaýǵa týra kelgen. Qatty jel men tolqyn qaıyqty alyp kete bastaǵan soń, sportshy qıyn sheshim qabyldap, qaıyqtyń sońynan júzýge tyryspaı, belgilengen baǵyt boıynsha qozǵalysyn jalǵastyrǵan.
– Ol kezde, árıne, ulym úshin qatty alańdadym. Alǵashynda qaıyqtyń sońynan júzýge tyrystym. Biraq ózim de baǵyttan jańylyp, adasyp ketýim múmkin ekenin túsindim. Sondyqtan júzýdi jalǵastyrýǵa týra keldi. Bul emotsııalyq turǵydan óte aýyr sát boldy, – dedi sportshy.
Qýanysh Asqardyń aıtýynsha, birneshe jyldyq jattyǵý barysynda bir qolyn barynsha tıimdi paıdalanýǵa múmkindik beretin ózindik júzý tehnıkasyn qalyptastyrǵan. Degenmen mundaı uzaq qashyqtyqta sheshýshi róldi psıhologııalyq daıyndyq atqarady dep esepteıdi.
– Balqashtyń tolqyndary men úshin múlde bólek boldy. Ózim Aqtaýdanmyn, teńizde júzýge úırengenmin. Biraq munda kóldiń ishindegi tolqyndardyń ózi óte qatty eken. Keıde tipti baǵyttan jańyldyrady. Qorqynyshty boldy, qıyn boldy. Biraq qashyqtyqty sońyna deıin jetkizýge degen nıet qorqynyshtan da, sharshaý men aýyrsynýdan da basym tústi, – dedi ol.
Sportshy úshin mundaı jarystardyń orny bólek. Bala kezinen fızıkalyq ereksheligine baılanysty basqa qatarlastarynan ózgeshe bolǵanymen, ol óz múmkindiginiń shektelmeıtinin eń aldymen ózine dáleldeýge umtylyp keledi.
– Balalaryma tolyqqandy ómir súre alatynymdy, sportpen aınalysyp, kóp adamnyń qolynan kele bermeıtin qıyndyqtardy eńsere alatynymdy kórsetý men úshin mańyzdy. Balalarymnyń meni maqtan tutqanyn qalaımyn. Bul da maǵan alǵa umtylýǵa kúsh beredi, – dedi Qýanysh Asqar.
Nátıjesinde jarysqa qatysýshylar Toranǵalyqtan «Jemchýjına» demalys aımaǵyna deıingi 21 shaqyrymdy tolyq júzip ótti. Ashyq sýdaǵy bul qashyqtyq Balqash kólinde uıymdastyrylǵan halyqaralyq jarystyń bir bóligi boldy.
Buǵan deıin ashyq sýda júzýden jasóspirimder arasyndaǵy álem chempıonatynda el namysyn kimder qorǵaıtynyn habarlaǵan bolatynbyz.
