Balqash kóliniń aýmaǵy týrızmdi damytý baǵdarlamasyna endi
NUR-SULTAN. QazAqparat - Balqash kóliniń aýmaǵy Qazaqstanda týrızmdi damytý baǵdarlamasyna endi, dep habarlaıdy QazAqparat.
Bul taıaý jyldary kýrorttyq aımaqty barlyq yqtımal tásildermen jaqsarta túsedi degendi bildiredi. Jaǵalaýda 20-dan astam demalys aımaǵyn salý, ınjenerlik jeliler júrgizý, Qaraǵandy-Balqash trassasyn jóndeý jumystaryn aıaqtaý jáne elimizdiń basqa óńirlerinen úlken ushaqtar qabyldaý úshin qala áýejaıyn qaıta jańartý josparda bar.
Jaǵalaýdy abattandyrý qalaı júrip jatqany týraly Balqash qalasynyń ákimi Oraz Táýirbekov áńgimelep berdi.
«Qazir biz úshin ekonomıkalyq ósimniń negizgi núktesi - Shubar-Túbek jáne Torańǵylyq kentteri. Demalys úılerin salýǵa bolatyn 20,5 shaqyrym bos jaǵalaý bar. Biz úshin negizgi mindet - kentterdi sýmen jabdyqtaý, sý burý, elektr energııasyn berý sekildi ınjenerlik jelilerdi júrgizý bolyp tabylady. Joba daıyn, memlekettik saraptama sheshimin kútemiz. Ol daıyn bolǵanda ǵana merdigerdi anyqtap, jumysqa kirise alamyz, - deıdi Balqash ákimi.
Onyń aıtýynsha, bul sharalar aımaqtyń ınvestıtsııalyq tartymdylyǵyn arttyrady jáne birden birneshe máseleni sheshedi. Olardyń biri - kýrorttyq aımaqtarda demalýdyń joǵary baǵasy jáne servıs deńgeıiniń tómendigi.
«Bul kentterde káriz de, ortalyqtandyrylǵan sý qubyry da bolǵan joq. Árıne, ol jerde demalys aımaǵyn ashý úshin kásipker bárin ózi qamtamasyz etýi tıis edi. Bul onyń qyzmetteriniń qymbattaýyna alyp keldi. Sondaı-aq, elektr energııasynyń baǵasyna aýyldyq tarıf áser etti, ol qaladaǵyǵa qaraǵanda joǵary. Sondaı-aq qoqys shyǵarý quny da bar, sebebi kentterdiń janynda polıgondar joq. Qazir biz bul máseleni sheshemiz. Shubar-túbek jáne Torańǵylyq kentterin Balqash qalasyna qosý protsesi bastaldy. Tek Úkimettiń maquldaýyn kútemiz, - dedi Oraz Táýirbekov.
Osyndaı biriktirý sharalarynan keıin osy eldi mekenderde kommýnaldyq qyzmetterge tarıfter tómendeýi tıis. Jer satý boıynsha aýktsıondaryn ótkizý de ońaı bolady. Olardyń birinshisi osy aıda ótedi.
Balqash qalasynda jol qurylysy belsendi júredi. Týrısterdiń negizgi aǵyny kýrorttyq aımaqqa jerústi kólikterimen keledi, sondyqtan munda jaqsy jol ınfraqurylymyn qurý basymdyqqa ıe.
«Jol jóndeý jumystary eki kezeń boıynsha júrip jatyr. Qazir Shubar-túbek aýylynyń jol jelisi jóndelýde. Munda ishki kenttik joldy ortasha jóndeý júrgiziledi. Onda negizgi jumystar aıaqtaldy. «Rıf« demalys aımaǵyna 300 metr asfalt salý, jaıaý júrginshiler ótkelderi men jasandy tegis emes joldar salý qaldy. Sodan keıin Torańǵalyqta joldardy jóndeýge kirisemiz. Onda respýblıkalyq trassadan bastap kentishilik jolǵa deıin 8 shaqyrym joldy jóndeımiz. Maýsym aıynyń sońyna deıin aıaqtaýdy josparlap otyrmyz», - deıdi Balqash ákimi.
Elimizdiń basqa óńirlerinen týrıster aǵynyn tartý úshin áýe qatynasyn da damytý josparlanyp otyr. Qazir Balqash áýejaıy ıAk-40 sııaqty shaǵyn ushaqtardy qabyldaı alady. Kýrort qalasynda Boıngter qonýy úshin áýe aılaǵy kúrdeli jóndeýden ótýi qajet. Aldyn ala esepteý boıynsha, buǵan 2,5 mlrd teńge shyǵyndalady.
Qaıta qurý jobasyn QR Premer-Mınıstri Asqar Mamınge usyndy. Qazir aerovokzal «Qazaqmys» korporatsııasyna tıesili. Jóndeýdi bıýdjetten qarjylandyrý úshin ony qalanyń kommýnaldyq menshigine berý qajet. Korporatsııa basshylyǵy oǵan óz kelisimin berdi.
Jaǵalaýdaǵy aýmaqty abattandyrý, ınjenerlik jeliler qurylysy, joldardy jóndeý jáne áýejaıdy qaıta jańartý jumystary 2023 jyly aıaqtalady. Aldyn ala boljam boıynsha, bul Balqashtaǵy týrıster aǵynyn 5 esege arttyrýǵa múmkindik beredi. Qazir kýrort jylyna 80 myń adamdy qabyldaıdy. Qaıta jańǵyrtýdan keıin demalýshylar sany 400-500 myńǵa deıin ósýi múmkin.
