Balqash kóline kóligimen batyp ketken er azamattyń múrdesi tabyldy
TALDYQORǴAN.QazAqparat - Almaty oblysynda Balqash kóline Vaz-2106 avtokóligimen batyp ketken 1964 jylǵy er azamattyń múrdesi tabyldy. Oqıǵa 20 jeltoqsan kúni Qaratal aýdanyna qarasty Qaraqum aýyly mańynda balyq aýlaý kezinde bolǵan, dep habarlaıdy QazAqparat tilshisi.
«Kelesi kúni tańerteń Almaty oblysy TJD Jedel-qutqarý jasaǵy qutqarýshylarynyń kúshimen balyqshyny izdeý bastaldy. Іzdeýge barlyǵy tórt qutqarýshy jáne úsh polıtsııa qyzmetkeri jumyldyryldy. 23 jeltoqsanda jergilikti ýaqytpen saǵat 12:00-de Balqash kólinde balyqshynyń denesi tabylyp, sýdan shyǵaryldy. Onyń qaýipsizdik erejelerin eskermeýi qaıǵyly jaǵdaıǵa alyp keldi. Avtokóliktiń muzdyń ústimen júrip ótý úshin, onyń qalyńdyǵy 30 sm kem bolmaýy kerek. Atalǵan oqıǵada muzdyń qalyńdyǵy 25-27 sm bolǵan. Sonymen qatar kóliktegi adamnyń qutqarý jıleti bolmaǵan»,- dep málimdedi Almaty oblystyq TJD baspasóz qyzmetinen.
Atalǵan vedomstvo ókilderi keleńsiz oqıǵalardan saqtaný úshin, muzda abaı bolý kerektigin jáne mindetti keńesterdi qatań oryndaý qajet ekenin eskertedi. Máselen, bir adam úshin qaýipsiz muzdyń qalyńdyǵy 10 sm kem bolmaýy kerek. Al ótkelderden ótý úshin muzdyń qalyńdyǵy 15 sm joǵary, avtokólikpen ótý úshin muzdyń qalyńdyǵy 30 sm kem bolmaýy tıis. Mamandardyń aıtýynsha, muzdyń beriktigin bylaı baıqap bilýge bolady. Kók tústi muz berik bolady, aq tústi muzdyń beriktigi 2 ese tómen, al kúńgirt aq nemese sarǵyshtaý muz qaýipti bolyp sanalady.
