Balqash kólinde joǵalyp ketken balyqshyny sýasty vıdeokameralar arqyly izdeýde
QARAǴANDY. QazAqparat - Balqash kóline batyp ketken balyqshyny izdeý úshin sýasty vıdeokameralar qoldanylýda, dep habarlaıdy «QazAqparat» HAA tilshisi.
«Іshinde adamy bar djıptiń sýǵa batqan sátinen segiz kún ótkenge qaramastan, izdestirý áli jalǵasýda. Oǵan respýblıkalyq jáne halyqaralyq konkýrstarda birinshi oryn ıelenip júrgen eń úzdik súńgýirler jumyldyryldy», - dedi Qaraǵandy oblystyq TJ departamenti baspasóz qyzmetiniń jetekshisi Qýanysh Mýtallapov.
Іzdestirý jumystaryna 24 tehnıka men 69 adam tartyldy. Qazirgi tańda oqıǵa ornynyń aýmaǵyndaǵy 90 myń sharshy metr tekserildi.
Eske sala keteıik, 21 naýryz kúni tórt balyqshy Qaraǵandy oblysyndaǵy Balqash kólinde muz astyna túsip ketken. «Nıssan Terano» avtomobıliniń júrgizýshisi úsh jolaýshymen birge Balqashtan eki shaqyrym jerdegi kóldiń muz qatqan betimen júrgen. Juqa muz qabaty jarylyp, kólik pen adamdar sýǵa ketken. Qutqarylǵan úsh er kisiniń aıtýynsha, olar djıptiń salonynda bolǵanda balyqshy dostaryn sý betine shyǵarǵan. Biraq, ózi úlgermegen.
