Balqash kólinde joǵalyp ketken balyqshy izdestirilýde
QARAǴANDY. QazAqparat - Súńgýirler «Nıssan Terano» avtomobılimen muz astyna batyp ketken Balqash turǵynyn izdestirýdi jalǵastyrýda, dep habarlaıdy «QazAqparat» HAA tilshisi.
Qaraǵandy oblystyq TJ departamentiniń baspasóz qyzmeti habarlaǵandaı, izdestirý jumystary túnde de júrgizilýde. «Súńgýirler táýlik boıy toqtaýsyz 1953 jylǵy azamatty izdeýde. Mashına sý betine shyǵaryldy. Alaıda, balyqshynyń múrdesi onda bolǵan joq», - dep habarlady TJ departamentiniń baspasóz qyzmeti.
Qutqarylǵan úsh er kisiniń aıtýynsha, olar djıptiń salonynda bolǵanda balyqshy dostaryn sý betine shyǵarǵan. Biraq, ózi shyǵyp úlgermegen.
Eske sala keteıik, 21 naýryz kúni tórt balyqshy Qaraǵandy oblysyndaǵy Balqash kólinde muz astyna túsip ketken. «Nıssan Terano» avtomobıliniń júrgizýshisi úsh jolaýshymen birge Balqashtan eki shaqyrym jerdegi kóldiń muz qatqan betimen júrgen. Juqa muz qabaty jarylyp, kólik pen adamdar sýǵa ketken.
