Balqash kólinde joǵalǵan balyqshylar tórt kún boıy izdestirilýde
QARAǴANDY. QazAqparat - Tótenshe jaǵdaılar departamentiniń súńgýirleri tórt kún buryn Balqash kóline balyq aýlaýǵa ketip, iz-túzsiz joǵalǵan eki balyqshyny izdestirip jatyr, dep habarlaıdy «QazAqparat» HAA tilshisi.
«Olar kólge 24 qyrkúıek kúni shyqqan. Alǵashqyda jergilikti turǵyndar ózderi izdegen, alaıda eshqandaı nátıje bolmaǵan. 25 qyrkúıek kúni TJ departamentine olardyń joǵalǵany týraly habarlama tústi. Oqıǵa ornyna TJ departamenti jedel-qutqarý jasaǵynyń súńgýirleri jóneltildi», - dep habarlady Qaraǵandy oblystyq TJ departamentiniń baspasóz hatshysy Janna Dáýrenbekova.
Joǵalǵan azamattardyń týystarynyń málimetinshe, olardyń turaqty túrde balyq aýlaıtyn jeri Tasaral aralynan ońtústikke qaraı 25 shaqyrym jerde bolǵan.
«Alǵashqy kúni teńiz daýylynyń qatty bolýyna baılanysty izdestirý jumystaryn tolyq kólemde júrgize almadyq. Qazir izdestirý-qutqarý jumystary jalǵasyp jatyr, úsh qutqarýshy-súńgýir men qutqarý kateri jumyldyryldy», - dedi TJ departamentiniń baspasóz hatshysy.
