Balqash kólinde sýǵa batyp kete jazdaǵan demalýshylar qutqaryldy
QARAǴANDY. QazAqparat - Balqash qalasy TJ basqarmasynyń qutqarýshylary sýǵa batyp kete jazdaǵan jeti demalýshyny jaǵaǵa shyǵardy, dep habarlaıdy «QazAqparat» HAA tilshisi.
Qaraǵandy oblysy TJ departamenti baspasóz qyzmetiniń basshysy Qýanysh Mutallapovtyń málimdeýinshe, TJ basqarmasyna habarlama kýágerlerden kelip túsken.
«Balqash kóliniń «Profılaktorıı» shıpajaıy mańynda adamdar mingen qaıyq aýdarylyp qalǵan. Jedel qutqarý tobynyń qutqarýshylary oqıǵa ornyna dereý jetti. Zardap shekkender «Windboat-47» kateriniń bortyna shyǵaryldy», - dedi Qýanysh Mutallapov.
Zardap shekkenderdiń barlyǵy Temirtaý qalasynyń turǵyndary. Olarmen qaıyqta ózderin qalaı ustaýy kerektigi jóninde túsindirý jumystary júrgizildi.
«Qurban bolǵandardyń tizimin tolyqtyrmas úshin qarapaıym erejelerdi saqtaý kerek, qaıyqqa adamdardyń shamadan tys otyrýyna jol bermeý, qaıyqty tebe otyryp, oryn aýystyrmaý jáne qutqarý jıletteri men belbeýlerinsiz sýǵa túsýge bolmaıdy», - dedi qaıyqta demalýshylardyń qaýipsizdik erejeleriniń negizgi talaptarymen tanystyrǵan Qýanysh Mutallapov.
