Balqash kólinde sý deńgeıi tómendep ketti
ASTANA. QazAqparat - Jetisý óńirindegi iri ózenderdiń barlyǵy Balqash kóline quıady. Ókinishke oraı keıingi jyldary olardyń aǵysy baıaýlap, kóldegi sý deńgeıi tómendep ketti, dep habarlaıdy QazAqparat «Habar-24» telearnasynyń saıtyna silteme jasap.
Telearna saıtynyń málimetterine qaraǵanda, qalyptasqan jaǵdaı kólde balyq qorynyń azaıýyna jáne aınaladaǵy ekologııalyq ahýaldyń buzylýyna sebep bolyp otyr.
«Jaǵdaıdy retteý úshin budan 2 jyl buryn Almaty oblysynyń ákimdigi arnaıy qaýly qabyldap, melıoratıvtik jasaq qurǵan. Ol Іle jáne Qaratal ózenderine shógip qalǵan qumdardy jaǵaǵa shyǵaryp, sýdyń aǵysyn jyldamdatady. Qamys basyp ketken toǵaılardy tazartady. Bıyl bundaı jumystarǵa oblys bıýdjetinen 80 mıllıon teńge bólinip otyr. Kelesi jyly budan eki ese kóp qarajat qarastyrylmaq. Saıyp kelgende, Balqash kólindegi balyqtar men mańaıdaǵy ósimdikter álemine yńǵaıly jaǵdaı týǵyzý kezek kúttirmeıtin shara», - deıdi mamandar
«Qaratal ózeniniń ekinshi arnasyn búgin Balqashqa alyp bara jatyrmyz. Búgingi tańda sharýanyń kóbi bitti. Jobamyz boıynsha osy aldaǵy qarasha aıynyń basynda jumys tolyǵymen aıaqtalady»,-deıdi «Qaratal» melıoratıvtik jasaǵynyń dırektory Baqbergen Mádibekov.
