Balqash kólinde muz bólinip, ústindegi 4 balyqshyny aǵyzyp áketken
QARAǴANDY. QazAqparat - Tótenshelikter Balqash kólinde jyljyp ketken muz ústinen tórt balyqshyny qutqaryp aldy, dep habarlaıdy QazAqparat tilshisi.
6 jeltoqsan kúni saǵat 14:07-de Aqóleń aýylynan ońtústikke qaraı 15 shaqyrym jerde Balqash kólinde muz qursaýynan 4 adam qutqaryldy. Muz bólinip, onyń ústindegi balyqshylar ashyq kólge ketip qalǵan.
Oqıǵa ornyna Qaraǵandy oblysy TJD bólimsheleriniń jedel toby shyqty. Zardap shekkendermen telefon baılanysy udaıy júrgizilip otyrdy.
Adamdar otyrǵan muz jaǵadan shamamen 10 shaqyrym qashyqtyqqa ketip qalǵan.
Qatty tolqynǵa qaramastan, qutqarýshylar qysqa ýaqyt ishinde «Hıvýs» aerokóligimen balyqshylardy taýyp, 17:35-te olardy jaǵaǵa jetkizdi.
Qutqarýshylar qys kezinde sý qoımasynda qaýip-qater artatynyn eskertedi. Sý aıdynyndaǵy muz ústimen jaıaý júrý de, kólikpen júrý de óte qaýipti. Túngi ýaqytta balyq aýlaýǵa jáne ań aýlaýǵa jol berilmeıdi. Borandy kúnderi sýǵa shyǵýǵa tyıym salynady.
