Balqash kólinde qutqarýshylar kezekshilikke jańa katermen shyqty

QARAǴANDY. QazAqparat – Qaraǵandy óńirinde qutqarýshylar tehnıkasy birtindep jańartylyp jatyr. Sońǵy jańalyqtardyń biri – jergilikti kompanııa shyǵarǵan «Bertis» kópfýnktsıonaldy kateri qoldanysqa berildi, dep habarlaıdy QazAqparat tilshisi.

Jańa kater 1 maýsymnan bastap Balqashtaǵy jaýyngerlik kezekshilikke tústi jáne shomylý maýsymy boıy kóldiń akvatorııasyn patrýldeıtin bolady.

«Kater korrozııaǵa ushyramaıtyn beriktigi joǵary materıaldan jasalǵan. Ol projektormen, ajyratymdylyǵy joǵary teńiz radarymen, 100 m tereńdikte jumys isteýge arnalǵan sýasty apparatymen, kvadrokoptermen jabdyqtalǵan. Jıyntyqqa qutqarý sheńberleri men keýdesheler, radıostantsııalar, aýa-tynys alý apparattary, qurǵaq jáne dymqyl úlgidegi gıdrokostıýmder, súńgýir aıaq kıimder men qapsyrmalar kiredi», - dep habarlady Qaraǵandy oblysy TJD baspasóz qyzmetinen.

Balqashtaǵy qutqarýshylarda 6 júzý quraly bar. Jańa jyldam júretin keme sýdaǵy oqıǵalar kezindegi jedeldikti arttyrýǵa múmkindik beredi.