Balqash kólinde iz-túzsiz joǵalǵan balyqshylardyń deneleri tabyldy
QARAǴANDY. QazAqparat - Qaraǵandy oblysy TJ departamenti jedel-qutqarý jasaǵynyń qutqarýshylary Balqash kólinen naýryz aıynda iz-túzsiz joǵalǵan balyqshylardyń óli denelerin tapty, dep habarlaıdy «QazAqparat» HAA tilshisi.
Balyqshylardyń deneleri Aqtoǵaı aýdanyndaǵy «Kors» túbeginiń ońtústik jaǵalaýynan bir shaqyrym jerden tabyldy. Ekeýi de Balqash turǵyndary bolǵan. Olar 30 naýryzdan beri iz-túzsiz joǵalǵandar qatarynda boldy. Sol kúni TJ departamentine týystary balyqshylardyń úıge oralmaǵanyn, baılanys úzilgenin habarlaǵan.
«9 sáýir kúni 17:50-de TJ departamenti jedel-qutqarý jasaǵynyń tórt qutqarýshysy eki er adamdy óli kúıinde tapty. Jaǵdaıdyń mán-jaıy anyqtalýda. 30 naýryzdan kúni keshege deıin er adamdar iz-túzsiz joǵalǵandar sanatynda edi», - dep habarlady Qaraǵandy oblysy TJ departamentiniń baspasóz hatshysy Aıdana Júsip.
