Balqash kóli túbinen 700 myń tonnadan astam tunba balshyq shyǵarylady
BALQASh. KAZINFORM — Balqashta Bertis shyǵanaǵynyń tabıǵı kelbetin qalpyna keltirý jáne sý aınalymyn jaqsartý maqsatynda iri kólemde kól túbin tazartý jumystary bastaldy. Úsh jylǵa josparlanǵan joba qazirgi ýaqytta óńirdegi eń mańyzdy ekologııalyq bastamalardyń birine aınalyp otyr.
Qaraǵandy oblysynda Balqash qalalyq jaǵajaıy mańyndaǵy Bertis shyǵanaǵyn tazartý jumystary resmı túrde bastaldy. Úsh jylǵa josparlanǵan bul ekojoba kóldiń tabıǵı tepe-teńdigin qalpyna keltirýge jáne jaǵalaý aımaǵynyń batpaqtanýyn toqtatýǵa baǵyttalǵan.
Joba aıasynda akvatorııanyń tereńdigi úsh metrge deıin ulǵaıtylady, sondaı-aq jaǵalaý syzyǵynyń uzaq jyldar boıy lastanǵan bólikteri tazartylmaq. Tunbany qazý úshin arnaıy balshyq tazalaıtyn keme qoldanylýda, al jaǵalaýda tórt pýlpa jınaqtaǵysh qurylysy bastalyp ketti. Mamandardyń aıtýynsha, shyǵarylatyn tunbanyń jalpy kólemi 700 myń tekshe metrden asady.
Tazartý aýmaǵy qala aýmaǵynan bastap Eski alań retinde belgili Qaramuryn shoqysyna deıin shamamen 200 metrdi qamtıdy. Sonymen qatar, sý aınalymyn tejep, jaǵalaýdyń batpaqtanýyn jedeldetken tórt eski pırs buzylyp jatyr.
Nysanda úzdiksiz jumys júrgizý úshin keri kúrekti ekskavatorlar men samosvaldar tartylǵan. Mamandardyń aıtýynsha, jobanyń júzege asýy kóldiń ekojúıesin aıtarlyqtaı jaqsartyp, tabıǵı protsesterdi qalpyna keltirýge múmkindik beredi. Bul Balqashtyń ekologııalyq baılyǵyn bolashaq urpaqqa saqtaý jolyndaǵy mańyzdy qadam.
Ekologııa, sý resýrstary jáne turaqty damý jónindegi sarapshy Bolat Esekın buǵan deıin Balqash kólindegi lastaný deńgeıiniń ósýine áser etetin negizgi faktorlardy túsindirgen bolatyn.