«Balqash»: Qazaqstandaǵy alǵashqy AES-tiń ataýy belgili boldy
ASTANA. KAZINFORM – Qazaqstanda eldegi alǵashqy atom elektr stantsııasyna úzdik ataý berý boıynsha jalpy halyqtyq konkýrs aıaqtaldy. Bul týraly Atom energııasy jónindegi agenttigi habarlady.
Konkýrs Memleket basshysy Qasym-Jomart Toqaevtyń 2025 jylǵy 11 tamyzdaǵy bastamasyn iske asyrý maqsatynda uıymdastyrylyp, 2025 jyldyń 25 qyrkúıegi men 10 qazany aralyǵynda eGov Mobile platformasynda ótti.
Konkýrs komıssııasynyń qorytyndy otyrysynyń nátıjesi boıynsha azamattardan eń kóp usynylǵan «Balqash» atom elektr stantsııasy» ataýy jeńimpaz dep tanyldy. Tańdalǵan ataý atom elektr stantsııalaryn geografııalyq belgi boıynsha ataý jónindegi halyqaralyq tájirıbege de sáıkes keledi.
Barlyǵy konkýrsqa 16 jastan asqan 27 157 Qazaqstan azamaty qatysty. Ár qatysýshyda bir ǵana ataý usyný múmkindigi boldy.
2025 jylǵy 5 qyrkúıekte quramyna qoǵam ókilderi, kreatıv ındýstrııa mamandary, sondaı-aq atom energetıkasy, fılologııa jáne tarıh salalarynyń sarapshylary kirgen konkýrs komıssııasy quryldy.
Túsken barlyq ótinimnen 10 460 biregeı nusqa anyqtaldy. Óńdeý barysynda kırıllıtsa, latyn árpi jáne maǵynalas sózder sııaqty jazýdyń túrli formalary da eskerildi.
Konkýrs komıssııasynyń otyrysynda eń tanymal 100 ataý qaraldy. «Balqash» atom elektr stantsııasy» ataýyn 882 azamat usyndy jáne ol tanymaldyǵy boıynsha qorytyndy reıtıngte birinshi oryn alyp, konkýrs jeńimpazy atandy.
Sonymen birge konkýrs komıssııasy nysannyń orys jáne aǵylshyn tilderindegi ataýlaryn anyqtady:
- «Atomnaıa elektrostantsııa «Balhash»»;
- «Balkhash Nuclear Power Plant».
«Balqash» nusqasyn usynǵan 882 qatysýshy bir aı ishinde eGov Mobile mobıldi qosymshasy arqyly avtordyń elektrondyq sertıfıkatyn alatyny atalyp ótti.
AES ataýyna qatysty usynystardy qabyldaý 2025 jylǵy 10 qazan saǵat 23:59–da aıaqtaldy. Bastamanyń basty maqsaty — bolashaq stantsııanyń tarıhı, mádenı jáne ulttyq mańyzyn beıneleıtin ataýdy tańdaý.