Balqash kásipkerleri apatty jaǵdaıdaǵy sý taratqyshty almastyryp berdi
QARAǴANDY-BALQASh. QazAqparat - Balqash qalasynyń kásipkerleri qalanyń ınfraqurylymyn damytýǵa jeke qarajattaryn jumsap, otansúıgishtiktiń úlgisin tanytyp jatyr, dep habarlaıdy «QazAqparat» HAA tilshisi.
Bıznesmender qaladaǵy káriz júıesin kúrdeli jóndeýdi bastady. Olar 7 kılometrden astam qubyrdy almastyrdy. Kásipkerlerdiń aıtýynsha, olar jergilikti bıýdjet juqarǵandyqtan emes, týǵan qalasyn abattandyrýǵa úles qosý maqsatynda osyndaı izgi amalǵa kirisken.
«Kásipkerler sýmen qamtý júıesin jaqsartý úshin «Toqyraý-Saıaq» sý taratý júıesiniń apattyq jaǵdaıdaǵy 7,4 kılometrlik qubyryn almastyryp berdi. 2018 jyly qalanyń káriz júıesin jańǵyrtý jónindegi iri joba jalǵastyrylyp, jylý jelilerin jóndeý boıynsha jobalyq-smetalyq qujattamalardy ázirleý aıaqtalady», - deıdi Balqash ákimi Aleksandr Aglıýlın turǵyndarmen kezdesýde.
Ákim kásipkerlerge alǵysyn bildirip, 2017 jyldyń sáýirinen beri Memleket basshysy bastamashyl bolǵan «Rýhanı jańǵyrý» baǵdarlamasy júzege asyrylyp jatqanyn tilge tıek etti.
Qala basshysynyń aıtýynsha, bıyl Balqashtyń ekonomıkasyn kóterýge kúsh salynady. Osy maqsatta 19 mıllıard teńge ınvestıtsııa quıylǵan. Shaǵyn jáne orta bıznesti, ásirese týrızm salasyn damytýǵa basa nazar aýdarylmaq.
