Balqash qalasynyń Jylý elektr ortalyǵynda kómir tıelgen vagondardan snarıadtardyń gılzalary tabyldy
ASTANA. Sáýirdiń 8-i. QazAqparat - Balqash qalasynyń Jylý elektr ortalyǵyna kelgen kómir artylǵan vagondardan snarıadtardyń 6 gılzasy tabyldy,
dep habarlady Qazaqstannyń Tótenshe jaǵdaılar mınıstrliginen.
TJM-nan habarlaǵandaı, tabylǵan gılzalar 100 jáne 120 mıllımetr kalıbrlik artıllerııalyq snarıadtan atylǵan jáne olardyń jarylý qaýpi joq.
Kómir tıelgen 49 vagonnyń sostavy Qaraǵandy oblysy «Borly» kómir basseıninen kelgen. Qalǵan 19 vagon tekserilý úshin temir jol tuıyǵyna qoıyldy. Kómir berý tsehynyń mańaıy qorshaýǵa alynyp, kúzet qoıyldy.
Aıta keteıik, osydan tórt kún buryn Qaraǵandy oblysy Temirtaý qalasyndaǵy «Arselor Mıttal Temirtaý» AQ-nyń №2-shi kómir baıytý fabrıkasyna kelgen vagondardan artıllerııalyq 52 snarıad tabylǵan bolatyn.
