Balqash qalasynyń JEO-synda jańa qazandyq salynyp jatyr

BALQASh. QazAqparat – Qaraǵandy oblysyndaǵy eń eski jylý-elektr ortalyǵynyń biri – Balqash JEO-synyń qýaty artady. Munda jańa, besinshi qazandyq salynýda. Bul jylý tapshylyǵy máselesin sheshýge jáne qala turǵyndaryn jylýmen qamtamasyz etýdi jaqsartýǵa múmkindik beredi, dep habarlaıdy qazAqparat tilshisi.

Balqashqa jumys sapary barysynda oblys ákimi Ermaǵanbet Bólekpaev JEO-da bolyp qaıtty. Aımaq basshysy jylý kóziniń jumysyn tekserdi.

Oblys ákimine jylytý maýsymynyń ótýi týraly baıandaldy. Stantsııany jańǵyrtý jáne besinshi qazandyqty salý boıynsha jumystardyń barysy týraly aıtyldy.

Ermaǵanbet Bólekpaev, sondaı-aq, balqashtyqtardyń ótinishimen salynǵan jańa emhana qurylysynyń barysymen tanysty.

Budan ári oblys ákimi Balqash-1 stantsııasynda boldy, onda taýnhaýs úlgisindegi turǵyn úılerdiń qurylysy júrip jatyr. Eki qabatty úıler áleýmettik osal sanattaǵy azamattarǵa, onyń ishinde kóp balaly otbasylarǵa jáne kezekte turǵan jetim balalarǵa arnalǵan. Eki taýnhaýstyń qurylysy aıaqtaldy, taǵy tórteýi salynady. Sonymen qatar, bıyl Balqashta 45 páterli eki úı qoldanysqa berilip, eki kópqabatty úı salynady.

Nysandardy aralaǵannan keıin Ermaǵanbet Bólekpaev Balqash turǵyndarymen kezdesti. Ashyq dıalog ótti. Qala turǵyndary kókeılerindegi ózekti suraqtaryn qoıdy. Olar negizinen TKSh, abattandyrý, joldar jáne qoǵamdyq kólik jumystaryna qatysty boldy.

Balqashtyqtar eskirgen avtobýs parkin jańartýdy surady. Olarǵa bul másele jaqyn arada sheshiletini aıtyldy. Qalaǵa jańa avtobýstar satyp alatyn jańa tasymaldaýshy keldi. Óz kezeginde bıýdjetten jolaýshylar tasymalyna sýbsıdııalar ulǵaıady.

Balqash eko belsendileri óz kezeginde kól jaǵalaýyndaǵy tabıǵı polıgondarǵa shaǵymdandy. Olar beınekameralar ornatýdy usynady. Olardyń ótinishi tyńdaldy. Jaǵalaýdy abattandyrý kezinde beınebaqylaý qarastyrylǵan.

«Bizdiń basty mindetimiz –Balqash turǵyndarynyń ómirin jaqsartý, turaqty jylý jáne sýmen qamtamasyz etý. Jeliler men joldardy jóndeý, abattandyrý jalǵasady. Turǵyndardyń barlyq suraqtary men shaǵymdary jazylyp, pysyqtalatyn bolady», - dedi Ermaǵanbet Bólekpaev.

Kezdesý sońynda óńir basshysy azamattardy jeke qabyldady.