Balqash qalasynda tegin ınvataksı paıda boldy
QARAǴANDY. QazAqparat - Balqash qalalyq múgedekter qoǵamy mamandandyrylǵan «Invataksı» avtomobılin satyp aldy, dep habarlaıdy QazAqparat Qaraǵandy oblysy ákimdiginiń saıtyna silteme jasap.
Múmkindigi shekteýli jandar úshin osyndaı jańa jyldyq syılyqty Halyq banki men «Halyq» jeke qaıyrymdylyq qory jasady.
«Qalada búgingi tańda 3 860 múmkindigi shekteýli adam turady. Olardyń 100-den astamy arnaıy avtokólik arqyly tasymaldaý qyzmetine muqtaj. Uzaq ýaqyt boıy bul másele boldy. Tasymaldaý boıynsha qyzmetter memlekettik áleýmettik tapsyrys qarajaty esebinen júzege asyryldy. 2019 jyly bul maqsatqa 3,6 mln teńge bólindi. 2020 jyly qarjylandyrý kólemi 35%-ǵa artty», - dedi Balqash qalasynyń ákimi Oraz Táýirbekov.
Balqash qalalyq Halyq banki fılıalynyń dırektory Aleksandra Aglıýkova «Balqash qalalyq múgedekter qoǵamy» qoǵamdyq birlestiginiń tóraǵasy Klara Jaqypbaevaǵa arnaıy avtokóliktiń kiltin tabys etti. Mashına arnaıy kótergish qurylǵylarymen jabdyqtalǵan. Invataksı jolaýshylardy baratyn jerine deıin tegin tasymaldaıtyn bolady.
