Balqash qalasynda samokat teýip bara jatqan balany kólik qaǵyp ketti

BALQASh. QazAqparat – 7 mamyrda Jeltoqsan kóshesindegi jaıaý júrginshiler jolynan samokatpen ótip bara jatqan 8 jastaǵy balany Toyota RAV4 markaly kóligi qaǵyp ketti. Bul týraly QazAqparat tilshisi Ekaraganda.kz saıtyna silteme jasap habarlaıdy.

Zardap shekken balany jedel járdem qyzmeti Balqash qalalyq aýrýhanasyna jetkizdi. Ol birden reanımatsııa bólimine jatqyzylyp, ota jasalǵan. Bala bas-súıek jaraqatyn alǵan, ish qýysy zaqymdanǵan.

«8 mamyrda ota jasaldy. Qazir bala reanımatsııa bóliminen hırýrgııalyq bólimge aýystyryldy. Emdeý jalǵasýda. Balanyń jaǵdaıy turaqty. Ári qaraı medıtsınalyq tekserýler, kompıýterlik tomografııa júrgiziledi. Sonymen qatar, neırohırýrgterdiń konsýltatsııasy qajet», - dep málim etti Balqash qalalyq Ortalyq aýrýhanasynyń travmatologııa bóliminiń meńgerýshisi Maqsat Nurtazın.

Kólik tizgininde 63 jastaǵy Balqash qalasynyń turǵyny bolǵan. Atalǵan oqıǵa boıynsha Qaraǵandy oblysynyń polıtsııa departamenti tergep-tekserý jumystaryn júrgizip jatyr. Tıisti saraptamalar taǵaıyndalǵan.