Balqash qalasynyń ákimi bolyp Saıan Muratuly taǵaıyndaldy

Jańa qala basshysyn Balqash qalasynyń aktıvine Qaraǵandy oblysynyń ákimi Ermaǵanbet Bólekpaev tanystyrdy. Oblys ákimi jańa ákimniń aldyna qoıylǵan negizgi mindetterdi aıqyndap, qalanyń ınjenerlik jáne áleýmettik ınfraqurylymyn odan ári damytý, kommýnaldyq qyzmetterdiń sapasyn arttyrý, abattandyrý jumystaryn júıeli júrgizý jáne áleýmettik mańyzy bar jobalardy tıimdi iske asyrýdyń basym baǵyt ekenin atap ótti.

— Sizdiń basty mindetińiz — balqashtyqtardyń ómir súrý sapasyn arttyrý, turǵyndarǵa jaıly ári qaýipsiz ómir súrý ortasyn qalyptastyrý, ınjenerlik jáne áleýmettik ınfraqurylymdy damytý. Sonymen qatar týrızm salasyn órkendetýge erekshe nazar aýdarý qajet. Atap aıtqanda, Balqash kóliniń biregeı tabıǵı áleýetin sporttyq jáne týrızmniń ózge de túrlerin damytý úshin barynsha tıimdi paıdalaný mańyzdy. Osyǵan baılanysty týrıstik ınfraqurylymdy jetildirý, jaǵalaý aımaǵyn abattandyrý, ınvestıtsııalar tartý, kórsetiletin qyzmetterdiń sapasyn arttyrý, sondaı-aq jańa týrıstik baǵyttar men nysandardy qalyptastyrý jumystaryn jandandyrý qajet, — dedi Ermaǵanbet Bólekpaev.

Saıan Muratuly memlekettik basqarý júıesinde 2015 jyldan beri eńbek etip keledi. Memlekettik qyzmettegi eńbek jolyn Balqash qalasynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminde abattandyrý, avtomobıl joldary, jolaýshylar kóligi jáne kommýnaldyq sharýashylyq sektorynyń bas mamany qyzmetinen bastaǵan.

Keıin Qaraǵandy oblysynyń energetıka jáne turǵyn úı-kommýnaldyq sharýashylyq basqarmasynda sýmen jabdyqtaý jáne sý burý bóliminiń bas mamany, keıin osy bólimniń basshysy qyzmetterin atqardy.

2022–2024 jyldary Aqtoǵaı aýdany ákiminiń orynbasary boldy. Odan keıin Qaraǵandy oblysynyń qurylys, sáýlet jáne qala qurylysy basqarmasy basshysynyń orynbasary qyzmetin atqardy. 2025 jyldyń tamyz aıynan bastap Balqash qalasynyń ákimi bolyp taǵaıyndalǵanǵa deıin Qaraǵandy oblysynyń qurylys, sáýlet jáne qala qurylysy basqarmasynyń basshysy boldy.

— Qurmetti Ermaǵanbet Qabdollauly, qurmetti depýtattar, áriptester! Maǵan kórsetilgen senim úshin shynaıy alǵysymdy bildiremin. Balqash — men úshin bóten qala emes. Bul jerde eńbek ettim, qalanyń ereksheligin, áleýetin jaqsy bilemin. Búginde qandaı máselelerdiń ózekti ekenin jáne turǵyndardy ne tolǵandyratynyn jaqsy túsinemin. Árbir kommýnaldyq máseleniń artynda naqty bir adamnyń, bir otbasynyń kúndelikti turmys sapasy turǵanyn sezinemin. Sondyqtan aldaǵy ýaqytta da qalanyń ınfraqurylymyn júıeli túrde damytyp, turǵyndarǵa qolaıly jaǵdaı jasaýǵa jáne Balqashtyń týrıstik áleýetin tolyq ashýǵa kúsh salamyz. Qalanyń turǵyndar úshin jaıly, qonaqtar úshin tartymdy ári ınvestıtsııa úshin qolaıly mekenge aınalyp, turaqty damýy jolynda bar kúsh-jigerimdi jumsaımyn, — dedi Saıan Muratuly.

Aıta ketelik Temirtaý qalasynyń ákimi bolyp Sapar Sataev taǵaıyndalǵan edi.