Balqash qalasynda memleketke qaıtarylǵan aktıvter esebinen áýejaı rekonstrýktsııasy aıaqtaldy
ASTANA. KAZINFORM - Qaraǵandy oblysynyń Balqash qalasynda zańsyz shyǵarylǵan aktıvterdi memleketke qaıtarý jumystary aıasynda áýejaıdy memleketke qaıtarylǵan qarajat esebinen aýqymdy rekonstrýktsııalaý jobasy aıaqtaldy, dep habarlaıdy Qaraǵandy qalalyq prokýratýrasynyń baspasóz qyzmeti.
Joba Qazaqstan Respýblıkasy Bas prokýrorynyń memleketke qaıtarylǵan aktıvterdi áleýmettik mańyzy bar nysandardy salýǵa jáne elimizdiń óńirlik ınfraqurylymyn damytýǵa baǵyttaý jónindegi bastamasynyń arqasynda júzege asty.
Qaraǵandy oblysy boıynsha memleketke qaıtarylǵan qarajatty bólý aıasynda Balqash qalasy áýejaıyn rekonstrýktsııalaýdy qarjylandyrý týraly sheshim qabyldandy.
Jobany iske asyrý kólik ınfraqurylymy nysanyn jańǵyrtýǵa, ushý qaýipsizdigi deńgeıin arttyrýǵa, jolaýshylarǵa qyzmet kórsetý sapasyn jaqsartýǵa, sondaı-aq óńirdiń týrıstik jáne ınvestıtsııalyq áleýetin damytýǵa qosymsha jaǵdaılar jasaýǵa múmkindik berdi.
Áýejaıdy rekonstrýktsııalaý memleketke qaıtarylǵan aktıvterdiń mańyzdy mindetterdi sheshýge jáne azamattardyń ómir súrý sapasyn jaqsartýǵa baǵyttalýynyń naqty mysaly bolyp tabylady.
-Júrgizilgen jumystardyń nátıjesinde Balqash qalasynyń kóliktik qoljetimdiligi edáýir artty jáne bul óńirdiń odan ári áleýmettik-ekonomıkalyq damýyna oń yqpal etedi,-elingen habarlamada.
Osyǵan deıin 2023 jyldan beri memleketke qaıtarylǵan aktıvterden qorǵa qansha qarajat túskeni týraly jazdyq.
