«Balqash» demalys aımaǵynyń ınjenerlik-kommýnıkatsııalyq jelilerin salýǵa 2,2 mlrd teńge bólinedi
2024 jyly «Balqash» týrıstik-rekreatsııalyq demalys aımaǵynyń ınjenerlik-kommýnıkatsııalyq jelilerin salýǵa 2,2 mlrd teńge bólinedi. Bul týraly Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Respýblıkalyq bıýdjet komıssııasynyń 2023 jylǵy 22 tamyzdaǵy sheshimimen 2024 jylǵy jobany («Balqash» týrıstik-rekreatsııalyq demalys aımaǵynyń ınjenerlik-kommýnıkatsııalyq jelilerin salý» jobasy) iske asyrýdy bastaýǵa 2,2 mlrd teńge mólsherinde qarajat bólý qoldaý tapty. Jalpy, jobalaý-smetalyq qujattamada sýmen jabdyqtaý, káriz, elektrmen jabdyqtaý qurylystaryn, avtomobıl jolyn, ákimshilik-turmystyq ǵımarattar men sý tazartý stantsııasyn salý kózdelgen», - dedi Álıhan Smaıylov jaýabynda.
Úkimet basshysynyń atap ótýinshe, 2020 jyldan bastap 50 tanymal týrıstik marshrýtqa túgendeý júrgizilip jatyr. Marshrýttardyń jalpy uzyndyǵy 7 500 shaqyrymdy quraıdy. Onda 584 sanıtarııalyq-gıgıenalyq torap, 239 tamaqtaný pýnkti, týrıster qyzyǵýshylyq bildirgen 244 obekti, 243 avtojanarmaı quıý stantsııasy, 132 ornalastyrý oryndary, 57 vokzal (aero, avto jáne temirjol vokzaldary), sondaı-aq 173 sanatorıı-kýrorttyq nysan jáne 202 balalar men jasóspirimder týrızmi obektisi qamtyldy.
«Júrgizilgen jumys nátıjeleri boıynsha jazǵy jáne qysqy marshrýttar katalogy, sondaı-aq 29 baǵyt kiretin Uly Jibek jolynyń qazaqstandyq bóligi jasaldy. Infraqurylymnyń jáne týrıster qyzyǵýshylyq bildirgen oryndardyń jaı-kúıi týraly ózekti derekter tourismonline.kz portalynda ornalastyrylǵan. Qazirgi ýaqytta 83 ınfraqurylymdyq joba iske asyrylýda», - dedi Premer-Mınıstr.
