Balqash bıylǵy shomylý maýsymynda 200 myńǵa jýyq týrıst qabyldady
BALQASh. KAZINFORM — 2026 jyldyń basynan beri Balqashqa 200 myńǵa jýyq týrıst kelgen, onyń shamamen 70 myńy tek shilde aıynda demalǵan. Týrıstik aǵynnyń ósýi kýrorttyq ınfraqurylymnyń damýy jáne kól jaǵalaýynda demalý múmkindikteriniń keńeıýimen baılanysty.
Bıylǵy týrıstik maýsymda qalada jáne oǵan irgeles kýrorttyq aımaqtarda jańa ornalastyrý jáne demalys nysandary ashyldy. Sonyń nátıjesinde nómirlik qor 128 orynǵa kóbeıip, shamamen 100 jańa jumys orny quryldy.
Jazǵy maýsymnyń mańyzdy oqıǵalarynyń biri tórtinshi ret ótken Balkhash Tour Fest festıvali boldy. Festıval aıasynda uıymdastyrylǵan túrli is-sharalarǵa shamamen 100 myń adam qatysty.
Demalýshylardyń jaılylyǵy men qaýipsizdigin arttyrý maqsatynda týrıstik aýmaqtarǵa 9 sanıtarlyq nysan, 11 kıim aýystyratyn kabınka jáne 105 qoqys jáshigi ornatyldy. Toranǵalyq jáne Shubartúbek demalys aımaqtarynda medıtsınalyq pýnktter men qutqarý stantsııalary táýlik boıy jumys istedi. Qoǵamdyq tártip pen qaýipsizdikti qamtamasyz etý úshin polıtsııa jáne qutqarý qyzmetteriniń qyzmetkerleri qosymsha tartyldy.
Týrızm salasyn damytýdaǵy mańyzdy oqıǵalardyń biri — Balqash áýejaıynyń rekonstrýktsııadan keıin qaıta jumysyn bastaýy boldy. Áýe qatynasynyń iske qosylýy qalany Astana jáne Almaty qalalarymen baılanystyryp, Qazaqstannyń basqa óńirlerinen týrıster tartýǵa qosymsha múmkindik berdi.
Sonymen qatar Balqash aldynda týrıstik ınfraqurylymdy odan ári damytý jáne týrıstik maýsymnyń uzaqtyǵyn arttyrý mindeti tur. Aldaǵy ýaqytta negizgi basymdyq jyl boıy týrızmdi damytýǵa, onyń ishinde sporttyq, saýyqtyrý, mádenı, gastronomııalyq jáne ekologııalyq baǵyttarǵa berilmek.
Buǵan deıin Balqash kólinde ashyq sýda júzýden jarys ótken bolatyn. Sportshylar Toranǵalyqtan «Jemchýjına» demalys aımaǵyna deıingi 21 shaqyrymdyq qashyqtyqty eńserdi.
