Balqash aýrýhanasy qaıtarylǵan aktıvter esebinen jóndeldi
QARAǴANDY. KAZINFORM – Qaraǵandy oblysynda Balqash kópbeıindi aýrýhanasyn aýqymdy jańǵyrtý jumystary aıaqtaldy. Jumystardy qarjylandyrý Memleket basshysynyń tapsyrmasy boıynsha qaıtarylǵan aktıvterdiń esebinen júzege asyryldy.
Densaýlyq saqtaý mınıstrligi málimetinshe, Balqash, Prıozersk qalalarynyń, Saıaq kentiniń, sondaı-aq Shet jáne Aqtoǵaı aýdandarynyń turǵyndary jańartylǵan korpýstarda dıagnostıka men em alýdyń jańa múmkindikterine qol jetkizdi.
Aýrýhana 340 tósekke arnalǵan jáne barlyq derlik beıindi bólimshelerdi qamtıdy. Aýyldyq densaýlyq saqtaýdy jańǵyrtý jónindegi ulttyq joba sheńberinde negizgi ǵımaratqa aýdany shamamen 1,4 myń sharshy metr bolatyn jańa qosymsha korpýs salyndy. Munda qoldanystaǵy barlyq standartqa sáıkes keletin zamanaýı qabyldaý bólimi ornalastyryldy. Patsıentterdiń yńǵaılylyǵy úshin josparly jáne shuǵyl emdeýge jatqyzýǵa arnalǵan bólek kireberister qarastyrylǵan.
Birinshi qabatta eki operatsııalyq bólme – shuǵyl operatsııalarǵa jáne joǵary tehnologııalyq teri arqyly jasalatyn aralasýlarǵa arnalǵan operatsııalyq bólmeler ashyldy. Onda jedel júrek-qan tamyrlary aýrýlary kezinde koronarografııa men stentteý júrgiziledi.
– Patsıentterdi dıagnostıkalaý jáne emdeý úshin qosymsha jabdyqtarmen jaraqtalǵan zamanaýı monoplandyq angıograf, magnıttik-rezonanstyq jáne kompıýterlik tomograftar, MEDRAD Mark 7 Arterion ınektsııalyq júıesi, neırohırýrgııalyq mıkroskop jáne barlyq qajetti medıtsınalyq buıymdar satyp alyndy, – dedi aýrýhana dırektory Serikbol Túsúpbekov.
Kadrlyq qamtamasyz etý turǵysynan búginde munda shamamen 900 qyzmetker, onyń ishinde 150-ge jýyq dáriger jumys isteıdi. Bıyl ujymǵa travmatolog, eki sáýlelik dıagnostıka mamany jáne eki ınterventsııalyq kardıolog qosyldy. Rezıdentýrany aıaqtaǵannan keıin ýrolog, hırýrg jáne terapevtterdi qosa alǵanda, taǵy birneshe mamannyń kelýi josparlanǵan. ️
Torańǵalyq jáne Shubartúbek kýrorttyq kentterinde medıtsınalyq pýnktter jumys isteıdi. Olarǵa jergilikti turǵyndarmen qatar týrıster de júgine alady. Medıtsınalyq pýnktter qajetti mamandarmen jáne medıtsınalyq kómek kórsetýge arnalǵan barlyq qajetti quralmen qamtamasyz etilgen.
Aıta keteıik, Shymkentte qaıtarylǵan qarajat esebinen jataqhana paıdalanýǵa berildi.
