Balqash aýdanynda mal qyryldy, jem-shóp tapshy degen aqparat jalǵan – QR AShM
8-tamyz kúni Aýyl sharýashylyǵy mınıstriniń mindetin atqarýshy Erbol Qarashókeevtiń tapsyrmasy boıynsha Almaty oblysy Balqash aýdany Balatopar aýyldyq okrýgine mınıstrlik qyzmetkerleriniń jumys toby jiberildi, dep habarlaıdy QazAqparat mınıstrliktiń baspasóz qyzmetine silteme jasap.
Olar jergilikti turǵyndarmen jáne sharýa qojalyqtarynyń basshylarymen kezdesti. Kezdesý barysynda jergilikti turǵyndar maldyń jappaı qyrylǵanyn rastaǵan joq jáne mal azyǵy tapshylyǵy týraly aqparatty joqqa shyǵardy.
Turǵyndardyń aıtýynsha, shabyndyq jerdiń shóbi maldy qystan alyp shyǵýǵa tolyq jetedi. Budan bólek, Balatopar aýylynan 25-30 km qashyqtyqta ornalasqan Balqash kóliniń jaǵasynan qosymsha mal azyǵyn daıyndaýǵa bolady.
Sonymen qatar, mınıstrlik ókilderi jeti adamnan turatyn brıgada traktorlarymen shópti shaýyp, jınap jatqan Topar jáne Jeltorańǵy aýyldarynyń shabyndyq jerlerin aralady.
Jalpy, Balatopar aýyldyq okrýgi men Balqash aýdany aýmaǵynda qurǵaqshylyq joq. Onymen qosa, shabyndyq jerler Jambyl jáne Іle aýdandarynyń fermerlerine, sondaı-aq Jambyl oblysynyń kórshiles aýdandaryna beriledi.
Balatopar aýylynda jáne jalpy Balqash aýdanynda qurǵaqshylyq saldarynan mal qyryldy, jem-shóp tapshy degen aqparat jalǵan.
Buqaralyq aqparat quraldarynda jarııalanǵan maldyń jappaı qyrylýy týraly aqparat shyndyqqa janaspaıdy jáne oǵan eshqandaı negiz joq.