Balqash alabuǵasyna arnalǵan kollektsııalyq monetalar aınalymǵa engizildi

ASTANA. QazAqparat – Búgin Ulttyq bank«Qazaqstannyń florasy men faýnasy» serııasynan BALQASH ALABUǴASY kollektsııalyq monetalaryn aınalymǵa shyǵarady, dep habarlaıdy QazAqparat.

Monetalardyń satylymǵa shyǵatyn kúnine qatysty qosymsha aqparat Ulttyq bank saıtynda jarııalanatyn bolady.

Balqash kóli – Qazaqstandaǵy eń alyp kólderdiń biri jáne kólemi jaǵynan álemde 15-orynda tur. Tuzdy jáne tuşy bólikten turatyn álemdegi jalǵyz tabıǵı sý toǵany.

Balqash alabuǵasy – kólde kezdesetin endemıkalyq balyqtardyń biri. Ol 5-7 mıllıon jyl buryn jaqyn tuqymdasy – kádimgi ózen alabuǵasynan shyqqan. Qazaqstannyń Qyzyl kitabyna engizilgen.

BALQASH ALABUǴASY kollektsııalyq monetalary 2 túrde daıyndaldy:

1. 925/1000 synamaly kúmisten jasalǵan. 3D jáne asa joǵary bederli tehnologııa qoldanylǵan. Massasy – 100 gramm, dıametri – 50 mm, nomınaly – 1000 teńge, taralymy – 500 dana;

2. MN 25 melhıor qospasynan daıyndalǵan. Massasy – 15 gramm, dıametri – 33 mm. Daıyndaý sapasy – «rroof-like», nomınaly – 200 teńge, taralymy – 20 myń dana.

Ulttyq bankten málim etkendeı, kollektsııalyq monetalar Qazaqstannyń búkil aýmaǵynda óziniń belgilengen qunyna saı tólemniń barlyq túri boıynsha qabyldana beredi. Sondaı-aq eldiń barlyq bankinde bank shottaryna esepke alynady, aýdarylady, usaqtalady jáne aıyrbastalady.

Kollektsııalyq monetalar Qazaqstan teńge saraıynda daıyndaldy.

Foto: www.nationalbank.kz