«Balqash» AES qurylysynyń kelesi kezeńi qandaı
ASTANA. KAZINFORM – Qazaqstan Respýblıkasynyń Atom energııasy jónindegi agenttiginiń tóraǵasy Almasadam Sátqalıev Máskeýde Rosatomnyń bas dırektory Alekseı Lıhachevpen kezdesý ótkizdi.
Kelissózder barysynda taraptar atom salasyndaǵy yntymaqtastyqtyń negizgi baǵyttaryn, sonyń ishinde Qazaqstandaǵy «Balqash» atom elektr stantsııasy jobasyn iske asyrý máselelerin qarastyrdy.
Kezdesýde kadr daıarlaý, ǵylymı-tehnıkalyq áriptestikti damytý, óndiristi oqshaýlaý jáne qazaqstandyq kásiporyndardy atom jobalaryna tartý máselelerine erekshe nazar aýdaryldy.
– Biz stantsııa qurylysyna qazaqstandyq kompanııalardy tartý, óndiristi oqshaýlaý, kadr daıarlaý jáne uzaq merzimdi yntymaqtastyq baǵyttaryn talqyladyq. Barlyq negizgi máseleler boıynsha ortaq túsinistikke qol jetkizildi, – dedi Almasadam Sátqalıev.
Óz kezeginde Alekseı Lıhachev «Balqash» AES jobasyn iske asyrý úshin keshendi daıyndyq jumystaryn júrgizýdiń mańyzyn atap ótti.
– Alańdy keminde bir jyl boıy baqylaý qajet. Sonyń negizinde barlyq qajetti esepter daıyndalyp, joba tabıǵı, geologııalyq jáne klımattyq erekshelikterge beıimdeledi, – dedi Alekseı Lıhachev.
Onyń aıtýynsha, joba alańnyń jergilikti erekshelikterin eskere otyryp ázirlenedi jáne reseılik atom tehnologııalaryna negizdeledi.
Taraptar atom energııasyn beıbit maqsatta paıdalaný salasyndaǵy yntymaqtastyqty jalǵastyrýǵa múddeli ekenin rastady.
Aıta keteıik, Qazaqstanda salynýy josparlanǵan «Balqash» AES jobasy eldiń energetıkalyq qaýipsizdigin kúsheıtýge baǵyttalǵan strategııalyq bastamalardyń biri sanalady.
Buǵan deıin Qazaqstanda AES-tiń radıoaktıvti qaldyqtary qaıda jóneltiletini habarlandy.
