Astananyń aınalma joly: Balqaraǵaı burylysynan Pavlodar baǵytyna deıingi jol ýchaskesi ýaqytsha jabylady
ASTANA. KAZINFORM — «QazAvtoJol» ulttyq kompanııasy 2026 jylǵy 20-25 mamyr aralyǵynda KZ 01-01 «Astana qalasynyń aınalma joly» avtomobıl jolynyń ýchaskesinde ortasha jóndeý jumystary júrgiziletinin habarlaıdy.
Jóndeý jumystary kezeńinde Balqaraǵaı demalys aımaǵynyń burylysynan bastap Pavlodar baǵytyna shyǵatyn kólik aıryǵyna deıingi jol ýchaskesinde 20 mamyr saǵat 17:00–den bastap 25 mamyr saǵat 00.00-ge deıin kólik qozǵalysy tolyqtaı ýaqytsha toqtatylady. Jabylatyn ýchaskeniń uzyndyǵy — 8 shaqyrym.
— Qozǵalysty tolyq shekteý jol qozǵalysy qaýipsizdigin qamtamasyz etý, jol-kólik oqıǵalarynyń aldyn alý jáne jóndeý jumystaryn sapaly ári belgilengen merzimde aıaqtaý maqsatynda engizilip otyr. Júrgizýshilerden saparlardy aldyn ala josparlaýdy, ýaqytsha shekteýlerdi eskerýdi jáne júrgizilip jatqan jumystarǵa túsinistikpen qaraýdy suraımyz, — delingen habarlamada.
Respýblıkalyq mańyzy bar avtomobıl joldarynyń jaı-kúıi týraly qosymsha aqparatty 1403 baılanys ortalyǵy arqyly alýǵa bolady.
Osydan buryn «QazAvtoJol» aqyly jolda aqaý anyqtalsa, tólem ýaqytsha toqtatylatynyn málimdegen edi.
