Balqan matematıkalyq olımpıadasynda qazaqstandyq tórt oqýshy úzdik atandy

ASTANA. KAZINFORM - Soltústik Makedonııada jasóspirimderge arnalǵan Balqan matematıkalyq olımpıadasy (JBMO) máresine jetti, dep habarlaıdy QR Oqý-aǵartý mınıstrliginiń baspasóz qyzmeti.

Qazaqstan quramasy jarysqa qatysý tarıhyndaǵy eń úzdik nátıje kórsetip, tórt altyn, bir kúmis jáne bir qola medal jeńip aldy. Komandalyq esepte 24 el qatysýshylarynyń arasynda qazaqstandyq oqýshylar ekinshi oryndy ıelendi.

Jeńimpazdar:

Anýar Aǵybaev – Almaty qalasyndaǵy NurOrda halyqaralyq mektebiniń 9-synyp oqýshysy;

Aleksandr Oleınıkov – Almaty qalasyndaǵy NurOrda halyqaralyq mektebiniń 9-synyp oqýshysy;

Jáńgir Bolat – Almaty qalasyndaǵy Respýblıkalyq fızıka-matematıka mektebiniń 8-synyp oqýshysy;

Batyrhan Beıǵanov – Almaty qalasyndaǵy Respýblıkalyq fızıka-matematıka mektebiniń 9-synyp oqýshysy;

Nurtaı Málik – Aqtóbe oblystyq «Bilim-ınnovatsııa» lıtseı-ınternatynyń 9-synyp oqýshysy;

Mıras Keńesbek – Qaraǵandy oblystyq «Bilim-ınnovatsııa» lıtseı-ınternatynyń 9-synyp oqýshysy.

Quramanyń jetekshileri: Taldyqorǵan qalasyndaǵy Nazarbaev Zııatkerlik mektebiniń matematıka páni muǵalimi Sergeı Polıanskıh jáne «Daryn» respýblıkalyq ǵylymı-praktıkalyq ortalyǵynyń ádiskeri Perızat Saýtbekova.

Anyqtama úshin: JBMO – 16 jasqa deıingi oqýshylarǵa arnalǵan bedeldi halyqaralyq olımpıada. Qatysýshy elderdiń qatarynda Albanııa, Bolgarııa, Grekııa, Rýmynııa, Serbııa jáne basqa da memleketter bar. Qazaqstan bul dodaǵa 2004 jyldan beri qatysyp keledi jáne dástúrli túrde úzdikter qatarynda. Ótken jyly Túrkııada ótken olımpıadada komanda 6 medal jeńip alǵan bolatyn.

Osyǵan dein bilim berý júıesine jasandy ıntellekt quraldaryn engizýdiń ulttyq saıasaty ázirlenetini týraly jazdyq.