Balqan elderinde Dáýletkereı men Mahambettiń kúıleri oryndaldy

ASTANA. QazAqparat - TÚRKSOI Jastar kameralyq orkestri Túrki mádenıetin jáne ónerin damytý halyqaralyq uıymynyń 25 jyldyǵyna oraı Balqan túbeginde uıymdastyrǵan gastrol týrnesin Bosnııanyń Zenıtsa qalasynda aıaqtady, dep habarlaıdy «QazAqparat» HAA TÚRKSOI-dyń baspasóz qyzmetine silteme jasap.

23 shildede bastalǵan týrne aıasynda orkestr Balqan túbeginiń úsh elinde 6 kontsert berdi. Kontsertter Prıshtına, Prızren, Tsetın, Mostar, Saraevo jáne Zenıtsa qalalarynda boldy.

Bıyl orkestrdiń quramy Ázerbaıjan, Qazaqstan, Qyrǵyzstan, Túrkııa jáne Túrikmenstannyń daryndy mýzykanttarymen tolyqty. Dırıjeri - ázerbaıjandyq maestro Mustafa Mehmandarov.

Týrnede orkestr álemdik klassıka týyndylarymen qatar, qazaqtyń áıgili aqyny Mahambettiń týyndysyn, qazaq halyq kompozıtory Dáýletkereı Shyǵaıulynyń «Kóruǵly» kúıin oryndady.

TÚRKSOI bas hatshysy Dúısen Qaseıinov Balqan týrnesi týraly aıta kele, onyń sátti bolǵanyn aıtty.

«TÚRKSOI Jastar kameralyq orkestriniń týrnesin tamashalaýǵa týysqan halyqtardyń ókilderi, sonymen qatar túrki mádenıeti men ónerine tánti adamdar kóptep jınaldy. Bıyl Halyqaralyq TÚRKSOI uıymynyń 25 jyldyǵyn toılap jatyrmyz. Shırek ǵasyrdan beri halyqaralyq mádenıe yntymaqtastyq uıymy túrli halyqtar arasynda dostyq kópirin salyp, mádenı jaqyndastyryp keledi», - dedi ol.