Balyq sharýashylyǵyn damytýǵa 120 mln teńge bólinbek
ASTANA. KAZINFORM – Májilis depýtattary balyq sharýashylyǵyn damytýǵa arnalǵan zań jobasyn jáne soǵan ilespe qujatty birinshi oqylymda maquldady.
Negizgi zań jobasyn tanystyrǵan Aýyl sharýashylyǵy mınıstriniń orynbasary Amanǵalı Berdalın salada jańa óndiristerdi quryp, jumys istep turǵandaryn keńeıtý úshin aqparattyq júıe qurylatynyn aıtty. Oǵan úsh jyldyq bıýdjetten 120 mln teńge qarastyrylǵan.
«Janýarlar dúnıesin qorǵaý, ósimin molaıtý jáne paıdalaný salasyndaǵy baqylaýdyń bir bóligi bolyp esepteletin balyq ósirý salasynda memlekettik baqylaý engizilýde. Maqsaty – saladaǵy tehnologııalyq protsesterdiń qaýipsizdigin qamtamasyz etý, onyń ishinde sý janýarlarynyń ózge tekti túrleriniń enýine jol bermeý. Baqylaýdy sýbektige baryp jáne barmaı-aq tekserý, profılaktıkalyq baqylaý aıasynda júzege asyrý josparlanýda. Bul rette jergilikti atqarýshy organdardyń bólimshelerin de merzimdi, jospardan tys tekserýler arqyly jáne qashyqtan baqylaý kózdelgen», - dedi Amanǵalı Berdalın.
Sondaı-aq, osy másele boıynsha ilespe zań jobasy da birinshi oqylymda maquldandy. Onyń aıasynda tórt zań aktisine ózgerister engizý kózdelip otyr.
