Balyq sharýashylyǵy sýbektilerin E-fish júıesinde tirkeý kúshine endi
ASTANA. KAZINFORM – «Janýarlar dúnıesin qorǵaý, ósimin molaıtý jáne paıdalaný týraly» QR Zańyna ózgerister engizildi. Bul «Akvasharýashylyq máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» QR Zańyn iske asyrý aıasynda júzege asyrylyp otyr. Bul týraly AShM málim etti.
Oǵan sáıkes, balyq sharýashylyǵy sýbektileri balyqtar men basqa da sý janýarlaryn monıtorıngteý boıynsha aqparattyq E-fish júıesinde mindetti túrde tirkelýge, sondaı-aq oǵan qajetti málimetter men derekterdi ýaqtyly engizýge tıis.
— Tirkeý jáne aqparat usyný tártibin balyq sharýashylyǵy salasyndaǵy ýákiletti organ aıqyndaıdy. Atalǵan túzetýler 2025 jylǵy 13 tamyzdan bastap zańdy kúshine endi, — delingen habarlamada.
Salany ashyq júrgizý jáne balyq ónimderiniń kóleńkeli aınalymyna jol bermeý maqsatynda E-fish aqparattyq júıesi 2024 jylǵy shildede Balyq sharýashylyǵy komıtetimen pılottyq rejımde engizilgen. Júıeniń negizgi maqsaty — esepke alý, ruqsat berý qujattaryn rásimdeý, balyq resýrstaryn óndirý men aınalymyn monıtorıngteý úderisterin avtomattandyrý, sondaı-aq salany tıimdi basqarýǵa arnalǵan biryńǵaı derekter bazasyn qalyptastyrý.
E-fish júıesi naqty ýaqyt rejıminde balyq pen balyq ónimderin aýlaý kólemin, tasymaldaý jáne ótkizý barysyn qadaǵalaýǵa, statıstıkalyq derekterdiń shynaıylyǵyn qamtamasyz etýge, bıznestiń ákimshilik júktemesin azaıtýǵa múmkindik beredi.
Júıeniń fýnktsıonalynyń arqasynda balyq sharýashylyǵy sýbektileri ýákiletti organǵa mindetti esepterdi qashyqtan tapsyra alady, sondaı-aq úıden ne keńseden shyqpaı-aq elektrondy óndiristik jýrnal júrgizýge qol jetkizedi.
Qazirgi ýaqytta E-fish birqatar negizgi memlekettik aqparattyq júıelermen, sonyń ishinde «E-lıtsenzııalaý», ÁІBT men TSOBT, «ASTANA-1», BBAJ «E-Agriculture» júıelerimen ıntegratsııalanǵan.
E-fish júıesin engizý jáne aýqymyn keńeıtý — balyq sharýashylyǵyn tsıfrlyq transformatsııalaý jolyndaǵy mańyzdy qadam, ári ashyq, tıimdi jáne turaqty salany qalyptastyrýǵa baǵyttalǵan shara.
Buǵan deıin habarlanǵandaı, Jaıyq-Kaspıı basseıninde 34,5 mln-nan astam shabaq qutqarylyp, tabıǵı ortaǵa jiberildi.