Balyq sharýashylyǵy komıtetiniń tóraǵasy sottaldy
ASTANA. KAZINFORM – Komıtet basshysy men onyń sybaılastary 6 jylǵa bas bostandyǵynan aıyryldy. Bul týraly Sybaılas jemqorlyqqa qarsy is-qımyl agenttiginiń resmı ókili Danııar Bıgaıdarov málim etti.
«Astana qalasynyń qylmystyq ister jónindegi aýdanaralyq sotynyń úkimimen Aýyl sharýashylyq mınıstrligi Balyq sharýashylyǵy komıtetiniń tóraǵasy N.T.Júnisov jáne onyń qaramaǵyndaǵylar – balyq resýrstaryn qorǵaý jáne balyq aýlaýdy retteý basqarmasynyń basshysy E.K. Sýyqbaev sottaldy. Sot úkimimen olarǵa 6 jylǵa bas bostandyǵynan aıyrý jazasy taǵaıyndaldy», - dedi Danııar Bıgaıdarov vedomstvoda ótken baspasóz máslıhatynda.
Sonymen qatar atalǵan tulǵalar memlekettik qyzmette laýazymdardy atqarý quqyǵynan aıyryldy.
«Olar 2021 jyldan 2024 jyldyń aqpanyna deıin shaǵyn jáne orta bıznes ókilderinen júıeli túrde para aldy dep aıyptaldy», - deıdi agenttiktiń resmı ókili.
Úkim zańdy kúshine engen joq.
Eske sala keteıik, Aýyl sharýashylyǵy mınıstrligi Balyq sharýashylyǵy komıtetiniń tóraǵasy bıyl 10 sáýirde jemqorlyq jasaý kúdigine iligip, ustalǵan edi.
