Balyq sharýashylyǵy komıteti ıtbalyqtardyń qurlyqqa shyǵyp ketýin túsindirdi
AQTAÝ. KAZINFORM — 2025 jyldyń aqpan aıynyń sońy men naýryz aıynyń basynda Kaspıı teńiziniń soltústik bóliginde aýa men sý temperatýrasynyń kúrt tómendeýi tirkeldi.
Sonymen qatar, osy kezeńde batys baǵyttaǵy jelder jaǵaǵa soǵyp, muzdardyń yǵysýyna jáne olardyń bir-birine tyǵyz taqalýyna yqpal etip, ıtbalyqtardyń sýǵa súngýine múmkindik bermegen. Osylaısha, eresek ıtbalyqtar tamaqtaný múmkindiginen aıyryldy. Azyq-túlik izdegen ıtbalyqtar Qarajanbas jáne Qalamqas ken oryndary janyndaǵy jaǵalaýǵa shyǵyp ketip, baǵdaryn joǵaltyp alǵan.
— Osyǵan baılanysty, Jaıyq-Kaspıı oblysaralyq balyq sharýashylyǵy basseındik ınspektsııasynyń memlekettik ınspektorlary Mańǵystaý oblysy ákimdiginiń ókilimen birlesip osy óńirge bardy. Aıta ketý kerek, aýa-raıynyń qolaısyzdyǵy (qar, kúshti jel, boran) ol jerge barýdy qıyndatty. Ol jerge kelgennen keıin jaǵdaıdy baǵalaý júzege asyrylady jáne adasqan ıtbalyqtardy tabıǵı ortaǵa qaıtarý boıynsha sharalar qabyldanady, — delingen habarlamada.
Buǵan qosa, jergilikti atqarýshy organdardyń, qoǵamdyq birlestikterdiń jáne buqaralyq aqparat quraldarynyń ókilderimen birlesip, aldaǵy kúnderi áýe kóligin paıdalana otyryp, óńirdi aınalyp ótý josparda. Jaǵdaı QR Aýyl sharýashylyǵy mınıstrliginiń beıindi vedomstvosynyń baqylaýyna alynǵan.
Buǵan deıin, ken oryndary aýmaǵynan 11 ıtbalyq tabylǵanyn jazǵan edik.