Balyq sharýashylyǵy komıteti ıtbalyqtardyń qyrylýyna qatysty túsinik berdi
AQTAÝ. KAZINFORM — Aýyl sharýashylyǵy mınıstrliginiń Balyq sharýashylyǵy komıteti 19 mamyrda Kaspıı teńiziniń jaǵalaýynan tabylǵan óli ıtbalyqtar týraly aqparatqa jaýap berdi.
2026 jylǵy 19 mamyrda Kaspıı teńizi memlekettik tabıǵı rezervatynyń qyzmetkerleri Jaıyq-Kaspıı oblysaralyq basseındik balyq sharýashylyǵy ınspektsııasy jáne Túpqaraǵan aýdanynyń jergilikti atqarýshy organymen birlesip, Túpqaraǵan aýdanyndaǵy Kaspıı teńizi jaǵalaýynda monıtorıng júrgizý barysynda jaǵalaýda qatty ydyraǵan (2-4 kezeń) 35 ıtbalyq óleksesin anyqtady.
-Aıta ketý kerek, óli ıtbalyqtardyń jaǵaǵa shyǵarylýy batystan soqqan kúshti daýyldyń saldarynan bolyp turady. Degenmen, barlyq ıtbalyqtardyń ólimi bir ýaqytta bolýy múmkin. Kaspıı ıtbalyǵyn zertteýdi júzege asyratyn ǵylymı uıym (Gıdrobıologııa jáne ekologııa ınstıtýty) synamalardy (tis, jún jáne tyrnaq) aldy. Al, Mańǵystaý oblysy boıynsha ekologııa departamenti sý men topyraq úlgilerin jınady. Tabylǵan ólekselerdiń qatty ydyraýyna baılanysty Veterınarııalyq baqylaý jáne qadaǵalaý komıtetiniń veterınarııalyq qyzmeti juqpaly aýrýlarǵa patologııalyq materıaldyń synamalaryn jınaı almady, - delingen habarlamada.
Kaspıı teńiziniń jaǵalaýyna monıtorıng jumystary áli júryp jatyr. Jergilikti atqarýshy organ balyq ınspektsııasymen, «Kaspıı ıtbalyǵy» MTR-mne, «Qazaq balyk» respýblıkalyq balyq sharýashylyǵy jáne akvasharýashylyǵy qaýymdastyǵymen birlese otyryp, ólekselerdi jınap, sanıtarlyq normalardy saqtaı otyryp kádege jaratty.
-Gıdrobıologııa jáne ekologııa ınstıtýty zertteýshileriniń aıtýynsha, ıtbalyqtar bir aıdan astam ýaqyt buryn ólgenimen, jaqynda ǵana batystan soqqan daýyl Mańǵystaý oblysy Túpqaraǵan aýdanynyń jaǵalaýynda jaǵaǵa shyǵyp qalǵan. Sonymen qatar, ǵalymdar kóp jyldar boıy júrgizilgen zertteýlerge súıene otyryp, ıtbalyqtardyń ólimi ımmýndyq júıeniń álsireýinen jáne juqpaly aýrýlarǵa beıimdilikke ákeletin jalpy qarsylyqtan bolýy múmkin dep sanaıdy. Jaǵalaýdaǵy monıtorıng jumystary jalǵasýda, jaǵdaı turaqty baqylaýda, - delingen habarlamada.
Buǵan deıin, Mańǵystaýda ıtbalyqtardyń jappaı qyrylýy tyıylar emes: taǵy 35 ólekse tabylǵanyn jazǵan bolatynbyz.
