Balyq ósirýmen aınalysatyn sharýashylyqtar sany artyp keledi

ASTANA. KAZINFORM – Elimizde balyq ósirýmen aınalysatyn sharýashylyqtar sany artyp keledi. Bul týraly AShM Balyq sharýashylyǵy komıtetiniń tóraǵasy Narıman Júnisov aıtty.

«2020 jylmen salystyrǵanda balyq sharýashylyqtarynyń sany 2,5 eseden astamǵa ósip, 500-den asyp otyr. Balyq ósirý kólemi de 9 myń tonnadan 20 myń tonnaǵa deıin ulǵaıdy. Balyq sharýashylyǵyna jeke ınvestıtsııanyń da turaqty ósip kele jatqany baıqalady. Máselen, 2021 jyly salaǵa 6,1 mlrd teńge ınvestıtsııa salynsa, ótken jyly negizgi kapıtalǵa salynǵan ınvestıtsııa kólemi 22 mlrd teńgege jetti», - dedi komıtet tóraǵasy Májilistegi «Akvaósirý týraly» zań jobasyn talqylaýǵa arnalǵan dóńgelek ústel otyrysynda.

Onyń atap ótýinshe, balyq sharýashylyǵy tabysty damytýdyń mańyzdy faktory – bul bastapqy kezeńde bızneske sýbsıdııalaý jáne salyqtyq jeńildikter túrinde qoldaý kórsetý. Búginde balyq sharýashylyǵynyń keıbir baǵyttaryn sýbsıdııalaý kózdelgen. 

«2023 jyly sýbsıdııalaýǵa 4,1 mlrd teńge qarastyryldy. Bul bir jyl burynǵykólemnen 4 esege kóp. Osy jylǵa shamamen 4 mlrd teńge qarastyrylyp otyr. Salalyq baǵdarlama aıasynda jyl saıyn qarjy kólemi arta túsetin bolady», - dedi Narıman Júnisov.