Balyq azyǵynyń óndirisi kenje qalyp otyr — depýtat
ASTANA. KAZINFORM — Shymkent qalasynda halyqaralyq AUYL FEST ótedi. Shara Eýropa men Ortalyq Azııa elderinen keletin balyq sharýashylyǵy mamandarynyń basyn qosyp, salanyń ózekti máselelerin talqylaýǵa múmkindik beredi.
— Festıval aıasynda balyq sharýashylyǵyn joǵary tehnologııalyq ındýstrııaǵa aınaldyrýǵa arnalǵan aýqymdy forým uıymdastyrylyp, negizgi nazar dástúrli balyq aýlaýdan óndiristik balyq ósirýge aýdarylmaq. Forým aıasynda balyq ósirýdiń avtomattandyrylǵan júıeleri men sýdy qaıta aınaldyrý qondyrǵylary tanystyrylyp, otandyq kásipkerler men eýropalyq ınvestorlar arasynda tikeleı kelissózder júrgiziledi dep kútilýde, — dedi Májilis depýtaty, «Aýyl» partııasynyń tóraǵasy Serik Egizbaev Jibek Joly telearnasynyń «Búgin Live» baǵdarlamasynda.
Balyqty óndiristik baǵytta ósirýdiń mańyzy da osy tusta aıqyn kórinedi, óıtkeni bul tehnologııalyq jańǵyrý ǵana emes, sonymen qatar resýrstardy tıimdi paıdalaný qajettiliginen týyndaıtyn qadam.
— Qazaqstan sý tapshylyǵy seziletin aımaqqa jatady. 80 paıyz sý syrttan keledi. Onyń ústine ońtústik aımaqtarda maýsymdyq kezeńderde bul másele tipti ótkir baıqalady. Sondyqtan tabıǵı jaǵdaılarǵa táýeldi bolmas úshin jańa mehanızmderden qashpaý kerek. Óndiristik formatqa kóshkende ónimdilik te artady. Sebebi arnaıy júıede balyqtyń qoregi men qajettiligi tolyq baqylaýda bolady, — dedi depýtat.
Osy rette saladaǵy ózgerister tájirıbelik deńgeıde emes, zańnamalyq turǵydan da qoldaý taýyp otyrǵanyn atap ótken jón.
— Ótken jyly Sý kodeksi qabyldandy. Ol sýdy paıdalanýdan sý únemdeý tehnologııalaryna kóshýdi kózdeıdi, — deıdi spıker.
Sonymen qatar memleket tarapynan kórsetiletin qoldaý sharalary da óndiristik baǵytqa ótýdi naqty tetikter arqyly yntalandyryp otyr.
— Orta jáne shaǵyn sharýashylyqtar tamshylatyp nemese jańbyrlatyp sýarý qondyrǵylaryn satyp alsa, onyń 80 paıyzyn Úkimet sýbsıdııalap beredi. Tarıfterde de ózgeshelikter bar. Byltyr sýarmaly jerlerdiń kólemi 150 myń gektarǵa ulǵaıdy. Aldaǵy ýaqytta ony 3 mln gektarǵa jetkizý jospary tur, — dedi ol.
Degenmen, júıeli damýǵa kedergi keltiretin túıtkilder bar.
— Balyq sharýashylyǵynda ımportqa táýeldilik saqtalyp otyr. Onyń basty sebebi — elimizde balyq azyǵy jetkiliksiz. Bul baǵytty jolǵa qoıý — aldaǵy mańyzdy mindetterdiń biri, — dedi depýtat.
Eske salaıyq, Qazaqstanda «Bekire-2026» balyq qorǵaý aktsııasy bastaldy.