Balyq aýlaýǵa ruqsat etilgen quraldardyń tizimi jańardy
ASTANA. KAZINFORM – Qazaqstanda kásipshilik jáne áýesqoı balyq aýlaýǵa ruqsat etilgen quraldardyń jańa tizimi bekitildi. Qujatta balyq aýlaıtyn aýlarǵa qoıylatyn talaptar men shaıan aýlaǵyshtardy paıdalanýǵa qatysty shekteýler belgilengen.
Ózgerister Aýyl sharýashylyǵy mınıstriniń 2026 jylǵy 4 qarashadaǵy buıryǵymen bekitildi. Qujatta balyq aýlaýǵa ruqsat etilgen quraldar men tásilderdiń tizimi jańartylǵan.
Kásipshilik balyq aýlaý úshin qurma, yǵyzba, drıfterli jáne qorshaıtyn aýlardy paıdalanýǵa bolady. Sondaı-aq tral, jylymnyń birneshe túrin, súzeki, súıretpe, venterler men shaıan aýlaǵyshtardy qoldanýǵa ruqsat etiledi.
Tizimge jaıyn aýlaýǵa arnalǵan arnaıy quraldar, kemelerge ornatylatyn balyq sorǵy jáne erlıfterli qondyrǵylar, artemııa tsıstalaryn jınaýǵa arnalǵan jabdyqtar da engen.
Balyq aýlaıtyn aýlarǵa jeke talap qoıylǵan. 2030 jylǵy 31 jeltoqsanǵa deıin túrli úlgidegi aýlardy paıdalanýǵa bolady. Alaıda dıametri 0,2 mıllımetrden jińishke sıntetıkalyq neılon nemese basqa da polıamıdti monojipten toqylǵan, kóziniń ólshemi 100 mıllımetrden kishi aýlardy qoldanýǵa bolmaıdy.
Áýesqoı balyqshylar qalqymaly, shybyndyq, túpti, tastama jáne ıilmeli qarmaqtardy, vobler, jerlıtsa, dóńgelek, blesna, mormyshka men trolldy paıdalana alady.
Belgilengen talaptar saqtalsa, sý astynda balyq aýlaýǵa arnalǵan myltyqty da qoldanýǵa bolady. Al bir balyqshy úshten artyq shaıan aýlaǵysh paıdalana almaıdy.
Buıryq 2026 jylǵy 21 qarashada kúshine enedi.
Balyq aýlaýǵa ýaqytsha tyıym salý merzimderi men bıyl ózgergen erejeler týraly osy materıaldan oqı alasyz.
Eske salaıyq, qazan aıynda Kaspıı teńizinde shekarashylar brakonerlerdiń jalpy uzyndyǵy 88 shaqyrym bolatyn balyq aýlaý quraldaryn tárkiledi. Aýǵa túsken bekire jáne basqa da balyq túrleriniń 2 337-si tabıǵı ortasyna jiberildi.
