Balyq aýlaýǵa ketken: BQO turǵyny 10 kúnnen beri izdestirilýde

Batys Qazaqstan oblysynda balyq aýlaýǵa ketken er adam 10 kúnnen beri tabylmaı jatyr, dep habarlaıdy Kazinform.

BQO Tótenshe jaǵdaılar departamentiniń baspasóz qyzmetinen málim etkenindeı, oqıǵa Kaztalov aýdany aýmaǵynda boldy.

«Kórshiles Jańaqala aýdanynyń turǵyny, 35 jastaǵy er adam 20 qazan kúni keshkisin «VAZ-2110» avtokóligimen shyǵyp ketkennen oralmaǵan. Kólik Kaztalov aýdany Qarasý aýyly men Aşysaı eldi mekeni arasyndaǵy daladan tabyldy. Ol dosymen birge balyq aýlaǵan, keıin dúkenge kirgen.

Qaraózenge jaqyn mańda izdestirý jumystary júrgizilip jatyr. Oǵan jedel qutqarý jasaǵy (5 adam, 1 júzý quraly, 1 tehnıka), aýdandyq TJ (1 adam) men polıtsııa bólimi (6 adam, 2 tehnıka), jergilikti atqarýshy organ men turǵyndar (13 adam, 3 tehnıka) jumyldyryldy. Keshe sondaı-aq tikushaq ta tartyldy», - dep habarlady vedomstvodan.

BQO Polıtsııa departamenti baspasóz qyzmetiniń naqtylaýynsha, 22 qazan kúni Jańaqala aýdandyq polıtsııa bólimine Jańaqala aýylynyń turǵyny, 33 jastaǵy áıelden aryz túsken. Onyń sózine qaraǵanda, 20 qazan, saǵat 14.30-da kúıeýi «VAZ-2110» avtokóligimen 36 jastaǵy dosymen birge Jańaqala aýdanymen shektesetin Qaraózenge balyq aýlaýǵa ketken. Sońǵy ret sol kúni saǵat 22.30-da habarlasqan. Ol kóligi synyp qalyp, adasyp ketkenin aıtqan. Avtokólik Kaztalov aýdany Qarasý aýylynan 6-7 shaqyrym jerden tabylǵan. Qazirgi kezde izdestirý jumystary jalǵasyp jatyr.