Balyq aýlaýda qandaı qaýipsizdik sharalaryn eskerý kerek

Qys mezgilinde turǵyndar arasynda balyq aýlaýǵa qumar jandar az emes. Degenmen keıde olardyń tarapynan qaýipsizdik sharalary saqtala bermeıdi. Bul tótenshe jaǵdaılarǵa alyp kelýi múmkin. Osy oraıda Kazinform tilshisi Qyzylorda oblysy Tótenshe jaǵdaılar departamentiniń Azamattyq qorǵanys basqarmasynyń bastyǵy Jandos Júginisovti áńgimege tartqan edi. 

- Qys mezgilinde balyq aýlaý kezinde azamattar saqtaýǵa tıis qarapaıym erejeler qandaı?

- Balyq aýlaý jáne shaǵyn kólemdi kemelermen ańshylyq kezinde saqtyq sharalaryna nazar aýdarylýy tıis. Máselen, qaıyqqa otyrý aldynda ony muqııat qarap, eskek, qutqarý sheńberi men sýdy quıyp alýǵa arnalǵan ydystyń bolýyna kóz jetkizgen artyq emes. Nazar aýdararlyq jaıt, túngi mezgilde balyq aýlaýǵa nemese ańshylyqqa tyıym salynady. Muz astynan balyq aýlaǵan kezde ekiden artyq shuńqyr tesýge jáne ot jaǵýǵa bolmaıdy. Qaıyqtyń jaramdylyǵyn, onyń qutqarý jıletimen, sheńbermen jáne t. b jabdyqtalýyn tekserý qajet.

- Azamattar ózimen birge qandaı zattardy alyp júrýi tıis?

- Ózimen birge dári-dármek qobdıshasy, qolsham, jergilikti jerdiń kartasy, óziniń turǵan jerin qulaqtandyratyn quraly bolýy tıis. Kemelerde, motorly jáne qarapaıym qaıyqtarda jeke qutqarý quraldarynsyz otyrǵan adamdarǵa eskertý sharasy kóriledi nemese bir aılyq eseptik kórsetkish kóleminde aıyppul (Ákimshilik quqyq buzýshylyq týraly kodeksiniń 583-babyna sáıkes) salynady.

- Muzdaǵy qaýipsizdik erejelerin saqtaý barysynda qandaı talaptarǵa nazar aýdarylýy tıis?

- Máselen, muzdyń juqa jáne qatpaǵan jerlerine shyǵýǵa bolmaıdy. Muzdyń jekelegen ýchaskelerinde toptarmen jınalýǵa bolmaıdy. Oıyqtarǵa, jaryqtarǵa jaqyndaýǵa qaýipti jaǵdaıǵa alyp kelýi múmkin. Oǵan qosa muz ústine kólikpen shyǵýdyń reti joq. Muz ústinde túngi ýaqytta jáne durys kórinbeıtin kezde shyǵýǵa ruqsat etilmeıdi.

- Bul baǵytta Qyzylorda oblysynda qandaı is-sharalar atqaryldy?

- Balyq aýlaý kezinde qaıǵyly oqıǵalardy boldyrmaý, sý aıdyndarynda qaýipsizdikti saqtaý maqsatynda jyl basynan beri oblysta 2452 reıdtik profılaktıkalyq jumystar júrgizildi. Bul baǵytta jadynama taratylyp, qyzmetkerler men eriktiler profılaktıkalyq jumystarǵa jumyldyryldy. Ókinishtisi, jyl basynan oblystyń sý aıdyndarynda 34 adam qaza bolǵan. Oblys aýmaǵyndaǵy sý aıdyndarynda qutqarýshylar 3 adamdy qutqardy.

Qala aýmaǵynda adam kóp shoǵyrlanǵan oryndarda daýys zoraıtqyshtary arqyly túsindirme jumysy júrgizilip jatyr. Áleýmettik jeli paraqshalarynda aqparattar men rolıkter jarııalandy. Balyq sharýashylyǵy ınspektsııasynyń qyzmetkerlerimen birlesip, oblys kóleminde profılaktıkalyq jumys barysynda azamattardyń zańsyz balyq aýlaý boıynsha 344 derek tirkeldi. Atalǵan faktige sáıkes 5 mln 097 myń 100 teńge aıyppul salyndy.

- Áńgimeńizge raqmet!

Eske salsaq, búdan buryn úsik shalýdyń qalaı aldyn alýǵa bolatyny jóninde maman keńesi berildi.