Balyq aýlaý men ańshylyq kezinde 10 aqmolalyq sý aıdyndarynda qaza tapty
KÓKShETAÝ. KAZINFORM – Aqmola oblysynyń qutqarýshylary óńirdiń balyqshylary men ańshylaryna sýdaǵy qaýipsizdik erejelerin eske saldy, dep habarlaıdy Kazinform agenttiginiń tilshisi.
— 1 qyrkúıekten bastap, ıaǵnı ańshylyq pen balyq aýlaý maýsymy bastalǵaly beri, oblys aýmaǵynda sý aıdyndaryn balyq aýlaýdy unatatyn turǵyndar jıi baryp júr. Apattardyń aldyn alý maqsatynda kúzgi ańshylyq jáne balyq aýlaý maýsymy bastalǵaly oblys aýmaǵynda reıdtik-profılaktıkalyq sharalar men patrýldeý jumystary júrgizilýde, — dedi Aqmola oblystyq TJD Azamattyq qorǵanys basqarmasynyń bastyǵy Baqyt Ablanov brıfıngte.
Sondaı-aq, óńirdiń qutqarýshylary ańshylyq jáne balyq aýlaý quraldaryn satatyn kásipkerlermen birlese jumys isteıdi. Oblys aýmaǵynda 50-den astam ańshylyq jáne balyq aýlaý dúkeni men 58 uıym (ańshylyq jáne balyq aýlaýdy baqylaý uıymy) bar. Balyq aýlaý quraldaryn satý barysynda satýshylar azamattarǵa balyq aýlaý kezindegi qaýipsizdik erejelerin eske salyp, arnaıy jadynama tabystaıdy.
— Sonymen qatar reıdtik is-sharalar barysynda Ákimshilik quqyq buzýshylyq týraly kodekstiń 412-baby (Sý aıdyndarynda qaýipsizdik erejelerin oryndamaý nemese buzý) boıynsha ákimshilik sharalar qoldanylady. Jyl basynan beri sý aıdyndarynda qaýipsizdik erejelerin buzǵany úshin 47 adam jaýapqa tartyldy, — dedi spıker.
Alaıda júrgizilip jatqan aldyn alý sharalaryna qaramastan, sońǵy 4 jyl ishinde oblys sý aıdyndarynda ańshylyq pen balyq aýlaý maýsymy kezinde 10 adam sýǵa batyp kóz jumǵan.
— Qaıǵyly oqıǵalarǵa kóbine qaıyqtaǵy qaýipsizdik sharalaryn saqtamaý, sonyń saldarynan qaıyqtyń aýdarylyp qalýy jáne balyq aýlaý kezinde jeke qutqarý keýdeshelerin paıdalanbaý sebep boldy. Osyǵan baılanysty ańshylyq pen balyq aýlaýdy unatatyn turǵyndardy qaýipsizdik erejelerin qatań saqtaýǵa shaqyramyn, — dedi qutqarýshy.
Onyń aıtýynsha, qaıyqqa otyrmas buryn ony muqııat qarap, eskek pen qutqarý sheńberiniń bar ekenine kóz jetkizý qajet.
— Qaıyqtyń jıegine otyrýǵa, qaıyqty shaıqaltýǵa nemese bir qaıyqtan ekinshisine aýysýǵa bolmaıdy. Qaıyqta otyrǵan adamdar mindetti túrde jeke qutqarý quraldaryn (qutqarý keýdeshelerin) kııýi tıis. Qarańǵy ýaqytta balyq aýlaý usynylmaıdy, al spırttik ishimdik ishýge qatań tyıym salynady, — dep túsindirdi Baqyt Ablanov.
Buǵan deıin balyq sharýashylyǵy sýbektilerin E-fish júıesinde tirkeý kúshine engeni habarlanǵan bolatyn.