Balıeva «jábir kórgen» 7 jasar balany Astanaǵa alyp keldi
ASTANA. QazAqparat - Ońtústik Qazaqstan oblysy Saryaǵash aýdanynda zorlyqqa ushyrady delingen jeti jastaǵy oqýshy bala jaqyndarymen birge Astanaǵa jetkizildi, dep habarlaıdy Habar 24.
Elimizdiń bala quqyqtary jónindegi ýákili Zaǵıpa Balıeva Shymkentke arnaıy baryp, keleńsiz oqıǵaǵa dýshar bolǵan jetkinshekti ózimen birge elordaǵa alyp kelgenin málimdedi.
Esterińizge sala keteıik, Ońtústik Qazaqstandaǵy jaǵdaıdan keıin óńirdegi jaýapty sheneýnikterdiń birazy qyzmetinen bosatylyp, keıbiri qatań sógispen qutyldy.
Qazaqstannyń Bala quqyqtary jónindegi ýákili, Parlament Májilisiniń depýtaty Zaǵıpa Balıeva atalǵan iske qatysty tilshilerge qysqa ǵana jaýap berip, taǵdyry tálkekke ushyraǵan balanyń elordada tıisti mamandardyń nazarynda ekenin aıtty.
«Biz bul máselege qatysty birneshe mamandy shaqyramyz. Bilim mınıstrligi men ishki ister mınıstrliginiń de ókilderi keledi. Olar barlyq suraqtarǵa tolyq jaýap berýi tıis. Búgin men bir saǵat ǵana uıyqtadym. Sondyqtan demalyp alyp, erteń arnaıy baspasóz máslıhatyn uıymdastyramyz», - dedi QR Bala quqyqtary jónindegi ýákili Parlament Májilisiniń depýtaty Zaǵıpa Balıeva.
Buǵan deıin habarlaǵanymyzdaı, keshe túnde Zaǵıpa Balıeva Ońtústik Qazaqstan oblysyna arnaıy kelip, óńirdiń ІІD bastyǵymen jáne qylmystyq is boıynsha ótip jatqan 7 jasar balanyń týystarymen kezdesti. Sondaı-aq balaǵa keshendi jáne táýelsiz sot-medıtsınalyq saraptama júrgizý úshin ózimen birge Astanaǵa alyp ketetinin aıtqan bolatyn.
