Balıeva depýtattardan Bala quqyqtary jónindegi zań ázirleýdi ótindi
ASTANA. QazAqparat - Qazaqstannyń Bala quqyqtary jónindegi ýákili Zaǵıpa Balıeva Májilis depýtattarynan Bala quqyqtary jónindegi zań ázirleýdi ótindi, dep habarlaıdy QazAqparat tilshisi.
«Bala quqyqtary jónindegi ýákil ınstıtýtyn tolyqqandy bıýdjetteý máselesin sheshý qajet. Parıj ustanymdary (adam quqyqtaryn yntalandyrý jáne qorǵaýmen aınalysatyn ulttyq mekemelerdiń mártebesine qatysty ustanymdar) ulttyq mekemeniń qyzmetin úzdiksiz júzege asyrylýyn qamtamasyz etetin ınfraqurylymǵa, onyń ishinde jetkilikti qarjylandyrýǵa ıe bolýy kerektigin talap etedi. Mundaı qarjylandyrý maqsaty ulttyq mekemege Úkimetten táýelsiz áreket etýi úshin óz qyzmetkerleri, ózi oryn-jaıy bolýy múmkindigin berýge negizdelgen», - dedi Qazaqstannyń Bala quqyqtary jónindegi ýákili Májilis depýtattary aldynda ótken jyldyń ishinde atqarǵan qyzmetter jaıynda baıandaı kele.
Onyń aıtýynsha, búginde bala quqyqtarynyń mártebesi «QR Bala quqyqtary týraly» Zańda aıqyndalǵan. Al Parıj ustanymdaryna sáıkes ulttyq quqyq qorǵaý mekemesine konstıtýtsııalyq jáne zańnamalyq aktilerden týyndaıtyn barynsha keń ýákildik berilgen.
«Osyǵan baılanysty Qazaqstannyń Bala quqyqtary jónindegi ýákili týraly arnaıy derbes zań ázirleý máselesi logıkalyq ári kezeń-kezeńdik qadam bola alady. Onda onyń ókilettigi naqty jazylady. Álemdik júıede mundaı tájirıbe keń taraǵan jáne táýelsiz quqyq qorǵaý mekemesiniń barynsha joǵary standarty retinde moıyndalady», - dedi ol.
Zaǵıpa Balıevanyń aıtýynsha, sheteldik seriktester elimizdegi bala quqyqtaryn qorǵaý isine joǵary baǵa berýde.
«Memleket basshysy Bala quqyqtaryn qorǵaý jónindegi ýákildigine qanshalyqty senim artatyndyǵyn bilmeımin. Biraq, menen keıin bul laýazymǵa kim kelse de uıymdasqan ınstıtýtqa tap bolady. Men qoǵamdyq bastamalar negizinde jumys isteımin. Eriktilermen ÚEU-larǵa rıshalyǵymdy bildiremin. Óıtkeni, jalǵyz ózimniń shamam jetpes edi. Búgingi kúni kómektesip kele jatqan Parlamentke de rızamyn. Eger men depýtat emes, qoǵamdyq bastamalar negizinde ýákil bolsam, onda qıyndyq týdyrar edi. Sondyqtan bolashaq Bala quqyqtary jónindegi ýákildiń jaǵdaıyn oılap otyrmyn. Bizge Parıj ustanymdaryn saqtaý qajet. Bul ınstıtýt táýelsiz jáne qarjylaı qamtamasyz etilgen bolýy tıis», - dep túıindedi sózin Qazaqstannyń Bala quqyqtary jónindegi ýákili.
