Balı jaǵalaýynda reseılik týrıster mingen qaıyq jaryldy
ASTANA. KAZINFORM — Indonezııanyń Balı araly jaǵalaýynda bortynda tórt reseılik týrıst pen gıd otyrǵan qaıyqta jarylys boldy, dep habarlaıdy Kazinform agenttigi TASS-qa silteme jasap.
Qaıyq shyǵanaqtan shyǵyp, baǵyttaǵy kelesi núktege bet alýǵa daıyndalyp jatqan kezde onyń akkýmýlıator bólikteri ornalasqan artqy jaǵynda jarylys bolǵan. Artynsha órt shyqqan.
Polıtsııanyń habarlaýynsha, jarylystan keıin týrıster men gıd órtten aman qalý úshin sýǵa sekirgen.
Olardy mańaıdan ótip bara jatqan basqa keme qutqaryp, jaǵaǵa jetkizgen. Qaıyqtaǵy adamdardyń barlyǵy aman qalǵan.
Gıdtiń aıtýynsha, jolǵa shyǵar aldynda qaıyq tehnıkalyq tekserýden ótken. Tekserý qorytyndysy boıynsha ony júzýge jaramdy dep tanyǵan.
Eske salaıyq, buǵan deıin Antalııada mıgranttar mingen qaıyq pen kater soqtyǵysyp, 14 adam qaza tapqanyn habarlaǵanbyz.
